Тогтоол №7027

ХЭРГИЙН ТАНИЛЦУУЛГА: "Ш" ХХК нь Ашигт малтмалын тухай хуулийн дагуу компани нэгтгэсний үндэслэлээр, "Х" ХХК-ийн хайгуулын 7643Х дугаартай тусгай зөвшөөрлийг шилжүүлэн авах өргөдлийг хуулийн хугацаанд шийдвэрлээгүй, улмаар хууль бус шийдвэрээр цуцалсан гэж үзэн, холбогдох шийдвэрүүдийг хүчингүй болгож, эрхийг нь сэргээлгэхээр шүүхэд нэхэмжилжээ. АНХАН ШАТ: Ашигт малтмалын газрын Геологи, Уул уурхайн кадастрын хэлтсийн холбогдох шийдвэрүүдийг хүчингүй болгож, тусгай зөвшөөрлийг "Ш" ХХК-д шилжүүлэхийг даалгасан. ДАВЖ ЗААЛДАХ ШАТ: Хариуцагч нь анхан шатны шүүхийн шийдвэрийг үндэслэлгүй гэж үзэж, өмнөх шүүхийн шийдвэрийг үгүйсгэсэн, хууль буруу хэрэглэсэн гэж гомдол гаргасан.

ҮНДЭСЛЭЛ: Ашигт малтмалын хайгуулын тусгай зөвшөөрлийг анх эзэмшигч нь өөрөө шилжүүлсэн, төлбөр төлөөгүйгээс цуцлагдсан, цуцлах шийдвэр нь хуулийн хүчин төгөлдөр шүүхийн шийдвэрээр зөвтгөгдсөн байхад, дахин шилжүүлэх, сэргээх боломжгүй тусгай зөвшөөрлийг шилжүүлэн өргөдлийг хүлээн авч шийдвэрлэсэн нь хууль бус гэж үзэж, анхан шатны шүүхийн шийдвэрийг хүчингүй болгон, нэхэмжлэлийн шаардлагыг бүхэлд нь хэрэгсэхгүй болгожээ.