Тогтоол №15613

ХЭРГИЙН ТАНИЛЦУУЛГА: “Д-” ХХК нь “А-” ХХК, Д.Б- нарт холбогдуулан ажил гүйцэтгэх гэрээний үүрэгт 705 658 800 төгрөг гаргуулах нэхэмжлэл гаргав. АНХАН ШАТ: “А-” ХХК-иас 84 707 864 төгрөг, Д.Б-аас 84 707 864 төгрөгийг гаргуулан “Д-” ХХК-д олгож, нэхэмжлэлийн үлдэх хэсгийг хэрэгсэхгүй болгов. ДАВЖ ЗААЛДАХ ШАТ: Нэхэмжлэгч нь анхан шатны шүүх гүйцэтгэсэн ажил, үнийн дүнг буруу тооцсон, нэмэлт ажлын төлбөрийг шийдвэрлээгүй гэж гомдол гаргав. Хариуцагч “А-” ХХК нь гэрээ байгуулаагүй, үүрэг хүлээгээгүй, хамтран үүрэг гүйцэтгэгч гэж үзсэн нь үндэслэлгүй гэж, хариуцагч Д.Б- нь ажлыг чанаргүй хийсэн, хүлээлгэж өгөөгүй, нэмэлт ажлын гэрээгүй гэж тус тус гомдол гаргав. ҮНДЭСЛЭЛ: Давж заалдах шатны шүүхээс анхан шатны шүүхийн шийдвэрийг өөрчлөн, гэрээг Д.Б- байгуулсан гэж үзэж, түүнээс 251 917 296 төгрөг гаргуулан “Д-” ХХК-д олгож, “А-” ХХК-д холбогдох шаардлагыг хэрэгсэхгүй болгожээ. Нэмэлт ажлын төлбөрийг гэрээнд заасан хэмжээнд хамааруулан тооцохгүй, чанарын доголдолтой хийсэн ажлын хөлсийг бууруулах үндэслэлтэй гэж үзэв.