Тогтоол №1331

ХЭРГИЙН ТАНИЛЦУУЛГА: Нэгдсэн эмнэлгийн даргыг ажлаас чөлөөлсөн тушаалыг хууль бус болохыг тогтоолгож, албан тушаалд нь эгүүлэн тогтоолгох, ажилгүй байсан хугацааны нөхөн олговор гаргуулах, даатгалын бичилт хийлгүүлэхээр нэхэмжлэл гаргасан. АНХАН ШАТ: Нэхэмжлэлийн шаардлагыг бүхэлд нь хангаж, ажлаас чөлөөлсөн тушаалыг хууль бус болохыг тогтоож, албан тушаалд нь эгүүлэн тогтоолгож, ажилгүй байсан хугацааны дундаж цалин хөлстэй тэнцэх хэмжээний нөхөн олговор олгож, даатгалын бичилт хийлгүүлэхээр шийдвэрлэсэн. ДАВЖ ЗААЛДАХ ШАТ: Гомдол гаргагч нь шүүх захиргааны хэргийн харьяалалгүй маргааныг шийдвэрлэсэн, үйлчилгээний албан хаагчийн хөдөлмөрийн гэрээгээр зохицуулагдах маргааныг шийдвэрлэсэн, хэрэг хянан шийдвэрлэх ажиллагааны журам зөрчсөн гэж гомдол гаргасан. Анхан шатны шүүхийн шийдвэрийг хэвээр үлдээж шийдвэрлэсэн. ХЯНАЛТЫН ШАТ: Гомдол гаргагч нь шүүх захиргааны хэргийн харьяалалгүй маргааныг шийдвэрлэсэн, үйлчилгээний албан хаагчийн хөдөлмөрийн гэрээгээр зохицуулагдах маргааныг шийдвэрлэсэн, хэрэг хянан шийдвэрлэх ажиллагааны журам зөрчсөн гэж гомдол гаргасан. Анхан болон давж заалдах шатны шүүхийн шийдвэр, магадлалыг хэвээр үлдээж, гомдлыг хангахгүй орхисон. ҮНДЭСЛЭЛ: Нэгдсэн эмнэлгийн даргыг томилох, чөлөөлөх асуудлыг Төлөөлөн удирдах зөвлөл шийдвэрлэх ба тухайн тохиолдолд эрүүл мэндийн газрын дарга гаргасан тушаал нь хуульд нийцэхгүй, эрх олгогдоогүй асуудлаар гаргасан. Эмнэлгийн даргын албан тушаал нь төрийн үйлчилгээний удирдлагын албан тушаал бөгөөд төсвийн шууд захирагчийн үүрэг хэрэгжүүлж, байгууллагын үйл ажиллагааг удирддаг тул захиргааны хэргийн шүүхэд харьяалагдах маргаан мөн. Хөдөлмөрийн харилцаа нь хөдөлмөрийн гэрээгээр бус, үр дүнгийн гэрээгээр зохицуулагдаж, төрийн албаны сонгон шалгаруулалтаар томилогддог.