Тогтоол №1432

ХЭРГИЙН ТАНИЛЦУУЛГА: "П Э" ХХК нь Нийслэлийн худалдан авах ажиллагааны газар, тус газрын үнэлгээний хороо, Нийслэлийн хөрөнгө оруулалтын газарт тус тус холбогдуулан тендерийн үнэлгээний хорооны дүгнэлт, мэдэгдлүүдийг хууль бус болохыг тогтоож, хүчингүй болгуулах, өөрөө шалгарсан болохыг тогтоож, гэрээ байгуулахыг даалгах шаардлага бүхий нэхэмжлэл гаргасан. АНХАН ШАТ: Нийслэлийн худалдан авах ажиллагааны газрын тендерийн үнэлгээний хорооны "П Э" ХХК-ийн тухай дүгнэлтийг хууль бус болохыг тогтоож, хүчингүй болгуулах, "З б" ХХК-ийг шалгаруулсан зөвлөмжийг хууль бус болохыг тогтоож, хүчингүй болгуулах, холбогдох мэдэгдлүүдийг хүчингүй болгуулах, "П Э" ХХК нь шалгарсан болохыг тогтоож, гэрээ байгуулахыг Нийслэлийн хөрөнгө оруулалтын газарт даалгах зэрэг шаардлага бүхий "П Э" ХХК-ийн нэхэмжлэлийг бүхэлд нь хэрэгсэхгүй болгосон. ДАВЖ ЗААЛДАХ ШАТ: Нэхэмжлэгч "П Э" ХХК нь анхан шатны шүүхийн шийдвэрийг эс зөвшөөрч, "З б" ХХК-ийн тендерийн материалаас илэрсэн алдааг шүүх хэлбэрийн төдий алдаа гэж үзсэн, шалгуур хангаагүй этгээдийг шалгаруулсан, нэхэмжлэгчийн эрх ашгийг хязгаарласан гэж үзэн давж заалдах гомдол гаргасан. Давж заалдах шатны шүүх нэхэмжлэгчийн гомдлыг хангахгүй орхиж, анхан шатны шүүхийн шийдвэрийг хэвээр үлдээсэн.

ҮНДЭСЛЭЛ: Нэхэмжлэгч "П Э" ХХК нь тендерийн зааварчилгаад заасан инженерүүдийн ажлын туршлага, боловсролын шаардлагыг хангаагүй байсан нь тогтоогдсон тул түүнийг тендерээс хасах нь хуулийн дагуу байсан. "З б" ХХК нь зураг төсөл ирүүлэх шаардлагыг хангаагүй байсан хэдий ч, нэхэмжлэгч өөрөө шаардлага хангаагүй тул "З б" ХХК-ийг шалгаруулсан шийдвэрийг хүчингүй болгох, нэхэмжлэгчийн шаардлагыг хангах боломжгүй байсан. Нэхэмжлэгчийн шаардлагыг хангахгүй орхиж, анхан шатны шүүхийн шийдвэрийг хэвээр үлдээсэн.