Тогтоол №1358

ХЭРГИЙН ТАНИЛЦУУЛГА: Нэхэмжлэгчийг үйл ажиллагааны үр дүнгийн гэрээгээр хангалтгүй үнэлгээ авсан гэх үндэслэлээр ажлаас чөлөөлсөн тушаал гарчээ. Нэхэмжлэгч нь уг тушаалыг хууль зөрчсөн, сонсох ажиллагаа хийгээгүй, хүчин төгөлдөр бус үнэлгээг үндэслэсэн хэмээн үзэж тушаалыг хүчингүй болгуулах, албан тушаалд эгүүлэн тогтоолгох, ажилгүй байсан хугацааны цалин болон даатгалын шимтгэлийг гаргуулахаар нэхэмжлэл гаргасан.

АНХАН ШАТ: Анхан шатны шүүх нэхэмжлэлийн шаардлагыг бүхэлд нь хангаж, сайдын тушаалыг хүчингүй болгож, нэхэмжлэгчийг урьд эрхэлж байсан албан тушаалд эгүүлэн тогтоож, ажилгүй байсан хугацааны цалин болон нийгмийн, эрүүл мэндийн даатгалын шимтгэлийг гаргуулахыг хариуцагчид даалгасан. Шийдвэрт Төрийн албаны тухай, Захиргааны ерөнхий, Хөдөлмөрийн тухай хуулийн холбогдох заалтуудыг үндэслэсэн.

ДАВЖ ЗААЛДАХ ШАТ: Хариуцагчийн итгэмжлэгдсэн төлөөлөгч давж заалдах гомдолдоо нэхэмжлэгчийг үр дүнгийн гэрээгээр хангалтгүй үнэлгээ авсан тул хөдөлмөрийн харилцааг дуусгавар болгох үндэслэлтэй, анхан шатны шүүх үнэлгээг хүчин төгөлдөр бус гэж үзсэн нь үндэслэлгүй, мөн нэхэмжлэгчийг төрийн жинхэнэ албан хаагч биш тул Төрийн албаны тухай хуулийн зохицуулалт хамаарахгүй гэж маргасан. Давж заалдах шатны шүүх анхан шатны шүүхийн шийдвэрийг хэвээр үлдээж, хариуцагчийн гомдлыг хангахгүй орхисон.

ҮНДЭСЛЭЛ: Хяналтын шатны шүүхээс хариуцагч албан тушаалтныг ажлаас чөлөөлөх эрхтэй боловч холбогдох хууль тогтоомжийг мөрдөх үүрэгтэйг тэмдэглэв. Ажлаас чөлөөлсөн нь Төрийн албаны зөвлөлийн журмын дагуу ярилцлага хийгээгүй, тайлбар гаргах боломж олгоогүй, үнэлгээний илтгэх хуудсыг гарын үсэг зурж, тэмдэг дарж албажуулаагүй зэрэг заалтуудыг зөрчсөн. Мөн Захиргааны ерөнхий хуулийн дагуу сонсох ажиллагаа хийгээгүй, актын хууль болон бодит үндэслэлийг тодорхой заагаагүй зэрэг заалтуудыг зөрчиж гаргасан захиргааны акт нь нэхэмжлэгчийн эрх ашгийг зөрчсөн гэж үзсэн. Үр дүнгийн гэрээний үнэлгээг хүчин төгөлдөр бус гэж дүгнэсэн тул үнэлгээний оноо үндэслэлтэй эсэхийг дүгнэх шаардлагагүй болсон. Иймд анхан шатны шүүхийн шийдвэр хууль ёсны бөгөөд үндэслэлтэй тул хэвээр үлдээх нь зүйтэй гэж үзэв.