Тогтоол №5194

ХЭРГИЙН ТАНИЛЦУУЛГА: Нэхэмжлэгч нь захиргааны байгууллагын актыг хүчингүй болгож, ажлын байранд эгүүлэн тогтоолгох, ажилгүй байсан хугацааны цалин, нөхөн төлбөр, хохирлыг гаргуулахаар нэхэмжилжээ. Нэхэмжлэгч нь хууль бусаар ажлаас халагдсан тул эрхээ хамгаалахаар шүүхэд хандсан байна. Хариуцагч нь нэхэмжлэгчийг хөрөнгө орлогын мэдүүлгээ хугацаанд нь гаргаж өгөөгүй, холбогдох хуулийг зөрчсөн гэж үзэн ажлаас халах нь хууль ёсны гэж маргажээ. АНХАН ШАТ: Аймгийн Засаг даргын захирамжийг хүчингүй болгож, нэхэмжлэгчийг ажлын байранд нь эгүүлэн тогтоож, ажилгүй байсан хугацааны цалин болох 3,014,476 төгрөгийг гаргуулж, шимтгэл төлөлтийг нөхөн хийлгэхээр шийдвэрлэжээ. Хууль бус акттай холбоотой учирсан хохирлыг хариуцагчаас гаргуулах нэхэмжлэлийн шаардлагыг хэрэгсэхгүй болгожээ. ҮНДЭСЛЭЛ: Ажил олгогч нь нэхэмжлэгчид ажилд томилогдсон захирамжаа гардуулах, ажлыг хүлээлгэн өгөхдөө хуулийн хугацааг хангаж, боломж нөхцөлийг бүрдүүлээгүй байхад худал мэдүүлэг өгсөн гэх үндэслэлээр шууд ажлаас халсан нь хууль бус шийдвэр болсон. Төрийн албаны тухай хууль, Захиргааны ерөнхий хууль, Авлигын эсрэг хууль, Нийтийн албанд нийтийн болон хувийн ашиг сонирхлыг зохицуулах, ашиг сонирхлын зөрчлөөс урьдчилан сэргийлэх тухай хуулийн холбогдох заалтуудыг зөрчсөн. Ажилгүй байсан хугацааны цалин, шимтгэл төлөлтийг Хөдөлмөрийн тухай хууль, Нийгмийн даатгалын тухай хуулийн дагуу хариуцагчаас гаргуулах нь үндэслэлтэй. Гэм хорын хохирлын хувьд өмгөөлөгчийн хөлс, зээлийн хүү нь захиргааны байгууллагын хууль бус үйлдлээс шууд учирсан хохирол гэж үзэхгүй учраас хангахаас татгалзсан.