Тогтоол №2912

ХЭРГИЙН ТАНИЛЦУУЛГА: Ашигт малтмал, газрын тосны газрын даргын тушаалыг хүчингүй болгуулж, урьд эрхэлж байсан албан тушаалтай дүйцэхүйц албан тушаалд эгүүлэн томилуулах, ажилгүй байсан хугацааны цалин, нийгмийн даатгалыг гаргуулах тухай нэхэмжлэл. АНХАН ШАТ: Нэхэмжлэлийн шаардлагыг бүхэлд нь хангаж, хариуцагчийн тушаалыг хүчингүй болгон, нэхэмжлэгчийг урьд эрхэлж байсан албан тушаалтай дүйцэхүйц албан тушаалд эгүүлэн тогтоож, ажилгүй байсан хугацааны цалин, нийгмийн даатгалыг олгох шийдвэрлэсэн.

ҮНДЭСЛЭЛ: Төрийн албаны тухай хуулийн 27.2.3-т заасан байгууллага өөрчлөн байгуулагдсан боловч албан тушаалтны чиг үүрэг хэвээр хадгалагдсан тохиолдолд тухайн албан тушаалд үргэлжлүүлэн ажиллуулах, эсхүл орон тоо цөөрсөн бол үр дүн, мэргэшлийн түвшингийн үнэлгээгээр шалгарсан албан хаагчийг томилох зохицуулалтыг шүүх хэрэглэсэн. Нэхэмжлэгчийн эрхэлж байсан албан тушаалын нэр өөрчлөгдсөн боловч чиг үүрэг нь хэвээр хадгалагдсан нь нотлогдсон. Мөн албан тушаалд шинээр томилогдсон этгээд тухайн албан тушаалд тавигдах ажлын туршлага, мэргэшлийн шаардлагыг хангаагүй байсан нь тогтоогдсон. Иймд хариуцагчийн гаргасан тушаал нь хууль бус болох нь тогтоогдож, нэхэмжлэлийн шаардлагыг бүхэлд нь хангах нь зүйтэй гэж үзсэн.