Тогтоол №2090

ХЭРГИЙН ТАНИЛЦУУЛГА: Ашигт малтмал, газрын тосны газрын даргын тушаалаар ажлаас чөлөөлөгдсөн нэхэмжлэгч нь уг тушаалыг хүчингүй болгож, албан тушаалд эгүүлэн тогтоолгож, ажилгүй байсан хугацааны цалин хөлсийг гаргуулах шаардлага гаргажээ. АНХАН ШАТ: Төрийн албаны тухай хуулийн зүйл заалтыг баримтлан нэхэмжлэлийн шаардлагыг бүхэлд нь хангаж, даргын тушаалыг хүчингүй болгон, нэхэмжлэгчийг албан тушаалд эгүүлэн тогтоож, ажилгүй байсан хугацааны олговор олгох шийдвэр гаргасан. ДАВЖ ЗААЛДАХ ШАТ: Хариуцагчийн итгэмжлэгдсэн төлөөлөгч нь нэхэмжлэлийн шаардлага хууль зүйн үндэслэлгүй, мөн шүүх хууль ёсоор болон үндэслэл бүхий байх шаардлагыг хангаагүй гэж гомдол гаргасан. Тухайлбал, албан тушаал байхгүй болсон, орон тоо цөөрсөн, сонгон шалгаруулалт явуулсан боловч шинэ албан тушаалд тавигдах шаардлагыг хангасан этгээдийг томилсон хэмээн маргажээ.

ҮНДЭСЛЭЛ: Анхан шатны шүүх нотлох баримтыг бүрэн цуглуулж, үндэслэл бүхий дүгнэлт хийсэн. Захиргааны актыг гаргахдаа хуулийн зүйл заалтыг давхар баримталсан нь хууль хэрэглээний хувьд буруу байсан. Нэхэмжлэгчийн урьд ажиллаж байсан ажлын байрны чиг үүрэг нь шинээр бий болсон ажлын байрны чиг үүрэгтэй агуулгын хувьд ижил бөгөөд энэ ажлын байрны орон тоо хасагдсан гэж үзэх хууль зүйн үндэслэлгүй. Мөн гуравдагч этгээд нь шинэ албан тушаалд тавигдах шаардлага хангаагүй болох нь тогтоогдож, энэ нь төрийн албаны шударга байдал, мэргэшсэн, тогтвортой байх зарчимтай нийцээгүй. Иймд анхан шатны шүүхийн шийдвэрийг хэвээр үлдээж, давж заалдах гомдлыг хангахгүй орхисон.