Тогтоол №5287

ХЭРГИЙН ТАНИЛЦУУЛГА: “А” ХХК нь Ж.Ч, Н.Д нарт холбогдуулан зээлийн гэрээг цуцлуулж, зээлийн төлбөр, нотариатын зардал гаргуулах, барьцаа хөрөнгөөр үүргийн гүйцэтгэлийг хангуулах тухай нэхэмжлэл гаргасан. Хариуцагчид зээлээ хугацаанд нь төлөөгүй боловч үүргийн гүйцэтгэлийг ялимгүй зөрчсөн гэж тайлбарласан. АНХАН ШАТ: Хариуцагч Ж.Ч, Н.Д нараас зээлийн төлбөрт 31,880,416.73 төгрөг гаргуулж, үлдэх 15,700 төгрөгт холбогдох шаардлагыг хэрэгсэхгүй болгож, шийдвэрийг сайн дураараа биелүүлээгүй тохиолдолд барьцаанд байгаа 2 өрөө орон сууцнаас үүргийн гүйцэтгэлийг албадан хангуулахаар шийдвэрлэсэн. ДАВЖ ЗААЛДАХ ШАТ: Анхны шатны шүүхийн шийдвэрийг хэвээр үлдээж, хариуцагчийн гомдлыг хангахгүй орхисон. ХЯНАЛТЫН ШАТ: Анх болон давж заалдах шатны шүүхийн шийдвэр, магадлал хууль ёсны болон үндэслэл бүхий байх шаардлагыг хангаагүй гэж үзэж, шийдвэр, магадлалыг хүчингүй болгож, хэргийг дахин хэлэлцүүлэхээр анхан шатны шүүхэд буцаасан. ҮНДЭСЛЭЛ: Хариуцагч гэрээгээр хүлээсэн үүргээ ямар хэмжээнд зөрчсөн, гэрээ цуцлах үндэслэл болох эсэх талаар шүүх үндэслэл бүхий дүгнэлт хийгээгүй, хэрэглэвэл зохих хуулийг зөв тайлбарлан хэрэглээгүй. Төлөөлөх эрхгүй этгээд нэхэмжлэл гаргасан, хариуцагч Ч.Буяндэлгэртэй холбоотой шаардлагаас татгалзсан нь үндэслэлгүй. Зээлдэгч нарын гүйцэтгээгүй үүрэг, төлөөгүй зээлийн хэмжээ тодорхой бус, хэрэг хянан шийдвэрлэх ажиллагааны журам зөрчсөнөөс маргааныг эцэслэн шийдвэрлэх боломжгүй.