Тогтоол №4510

ХЭРГИЙН ТАНИЛЦУУЛГА: Нэхэмжлэгч нь автобусны жолоочоор ажиллаж байсан бөгөөд Үйлдвэрчний эвлэлийн орон тооны бус хорооны даргаар сонгогдсон. Түүнийг хүндэтгэн үзэх шалтгаангүйгээр ажил тасалсан гэх үндэслэлээр ажлаас халсан тул өмнөх ажилд нь эгүүлэн тогтоож, ажилгүй байсан хугацааны цалин, нийгмийн болон эрүүл мэндийн даатгалын нөхөн бичилтийг гаргуулахыг хариуцагч байгууллагаас нэхэмжилсэн. Хариуцагч нь нэхэмжлэгчийг эмнэлгийн чөлөөний хугацаа дууссаны дараа 49 хоног ажил тасалж, хөдөлмөрийн гэрээ болон дотоод журмыг ноцтой зөрчсөн тул хуулийн дагуу ажлаас халсан гэж тайлбарласан.

АНХАН ШАТ: Шүүх нэхэмжлэгчийн нэхэмжлэлийг Хөдөлмөрийн тухай хуулийн 128.1.2-т заасныг үндэслэн бүхэлд нь хэрэгсэхгүй болгосон.

ДАВЖ ЗААЛДАХ ШАТ: Нэхэмжлэгчийн итгэмжлэгдсэн төлөөлөгчийн гомдлыг хангахгүй орхиж, анхан шатны шүүхийн шийдвэрийг хэвээр үлдээсэн.

ХЯНАЛТЫН ШАТ: Нэхэмжлэгчийн итгэмжлэгдсэн төлөөлөгч давж заалдах шатны магадлалыг эсэргүүцэж гомдол гаргасан. Гомдолд эмнэлгийн магадалгаа, хуудас олгох журам зөрчигдөөгүй, хариуцагч ажлаас халахдаа дотоод журам болон хамтын гэрээ, Хөдөлмөрийн тухай хуульд заасан сахилгын шийтгэл хүлээлгэх хугацааг зөрчсөн, мөн Үйлдвэрчний эвлэлийн сонгуульт ажилтны эрхийг зөрчсөн зэрэг үндэслэлийг дурдсан. Хяналтын шатны шүүх доод шатны шүүхийн шийдвэр, магадлалыг хүчингүй болгож, хэргийг дахин хянан хэлэлцүүлэхээр анхан шатны шүүхэд буцаасан.

ҮНДЭСЛЭЛ: Анхан болон давж заалдах шатны шүүхийн шийдвэр, магадлал нь хууль ёсны бөгөөд үндэслэл бүхий байх шаардлагыг хангаагүй. Доод шатны шүүхүүд нэхэмжлэгчийг Хөдөлмөрийн тухай хуулийн 40.1.4-т зааснаар хөдөлмөрийн сахилгын ноцтой зөрчил гаргасан гэж үзсэн. Гэвч хэрэгт нэхэмжлэгч Үйлдвэрчний эвлэлийн хорооны даргаар ажилладаг болохыг гэрчлэх баримт байхад шүүх анхаараагүй. Мөн нэхэмжлэгч Үйлдвэрчний эвлэлийн сонгуульт ажилтан эсэхийг тодорхой болгох шаардлагатай. Үйлдвэрчний эвлэлүүдийн тухай хуулийн 6 дугаар зүйлийн 2 дахь хэсэгт ҮЭ-ийн сонгуульт ажилтныг захиргааны санаачлагаар ажлаас халахыг хориглодог. Хэргийн нөхцөл байдал тодорхой бус байгаа тул доод шатны шүүхүүд хэрэглэвэл зохих хуулийг хэрэглэсэн эсэхийг дүгнэх боломжгүй байна. Иймд хэргийг дахин хянан хэлэлцүүлэхээр буцаасан.