Тогтоол №2856

ХЭРГИЙН ТАНИЛЦУУЛГА: П.Лхагвасүрэн, О.Цогтбаяр нар бүлэглэн тээврийн хэрэгсэл ашиглан 3 хонь хулгайлж бага бус хэмжээний хохирол учруулсан. Давтан үйлдлээр тэд Ч.Хатанбаатартай бүлэглэн тээврийн хэрэгсэл ашиглан 2 үхэр хулгайлж их хэмжээний хохирол учруулсан гэмт хэрэгт холбогджээ.

АНХАН ШАТ: Анхан шатны шүүх П.Лхагвасүрэн, О.Цогтбаяр нарыг бүлэглэн, давтан үйлдлээр, тээврийн хэрэгсэл хэрэглэж хулгай хийсэн, Ч.Хатанбаатарыг бүлэглэн, тээврийн хэрэгсэл хэрэглэж хулгай хийсэн гэм буруутайд тооцож, Эрүүгийн хуулийн 145.2 дахь хэсэгт зааснаар 4-6 сарын баривчлах ялаар шийтгэсэн. Ч.Хатанбаатарын эзэмшлийн тээврийн хэрэгслийг улсын орлого болгож, хохирогчдод учирсан хохирлыг ялтнуудаас гаргуулахаар шийдвэрлэжээ.

ДАВЖ ЗААЛДАХ ШАТ: Ялтны өмгөөлөгч давж заалдах гомдолдоо тээврийн хэрэгслийн эзэмшигч нь ялтан биш байхад улсын орлого болгосон нь буруу, мөн ялтнуудын оролцоо, хохирол төлсөн байдал, урьд өмнө ял шийтгүүлж байсан байдлыг ялгамжтай харгалзан ял оногдуулаагүйг үндэслэн анхан шатны шийтгэх тогтоолыг хүчингүй болгож, хэргийг дахин шийдвэрлүүлэхийг хүссэн. Прокурор анхан шатны шийтгэх тогтоолыг хэвээр үлдээх дүгнэлт өгсөн. Давж заалдах шатны шүүх анхан шатны шийтгэх тогтоолыг хүчингүй болгож, хэргийг нэмэлт мөрдөн байцаалт хийлгэхээр прокурорт буцаасан.

ҮНДЭСЛЭЛ: Анхан шатны шүүхийн шийтгэх тогтоол нь Эрүүгийн байцаан шийтгэх хуулийн шаардлагыг хангаагүй, хууль ёсны болон үндэслэлтэй бус байна. Аймгийн прокурорын яллах дүгнэлтэд шүүгдэгч Ч.Хатанбаатарын үйлдсэн хэргийн агуулга, арга, санаа зорилго, учирсан хохирол, хуулийн зүйл хэсгийг тодорхойлж бичээгүй байхад анхан шатны шүүх хэргийг шийдвэрлэсэн нь алдаатай. Иймд хэргийг нэмэлт мөрдөн байцаалт хийлгэхээр буцаах нь зүйтэй гэж үзсэн.