19 дүгээр зүйл.Эрхтэн, эд, эс шилжүүлэн суулгах асуудал хариуцсан эрүүл мэндийн байгууллагын чиг үүрэг

19.1.Эрхтэн, эд, эс шилжүүлэн суулгах асуудал хариуцсан эрүүл мэндийн байгууллага нь Эрүүл мэндийн тухай хуульд заасан тусгай мэргэжлийн төв байна.

19.2.Эрхтэн, эд, эс шилжүүлэн суулгах асуудал хариуцсан эрүүл мэндийн байгууллага эрхтэн, эд, эс шилжүүлэн суулгах чиглэлээр дараах үйл ажиллагааг хэрэгжүүлнэ:

19.2.1.эрхтэн, эд, эс шилжүүлэн суулгах үйл ажиллагааг мэргэжил, арга зүйн удирдлагаар хангах, уялдуулан зохион байгуулах, хэрэгжилтэд нь хяналт тавих;

19.2.2.донор эмнэлэг болон эрхтэн, эд, эс шилжүүлэн суулгах тусламж, үйлчилгээг үзүүлэх эрүүл мэндийн байгууллагатай хамтран ажиллах ба энэ хуулийн 12.6, 13.2-т заасан журмыг хэрэгжүүлэх үйл ажиллагааг нэгдсэн удирдлагаар хангаж, хяналт тавих;

19.2.3.эрхтэн, эд, эс шилжүүлэн суулгах тусламж, үйлчилгээтэй холбоотойгоор иргэн, эмчлүүлэгчид эрсдэл үүсэх, хохирол учрахаас урьдчилан сэргийлэх арга хэмжээг холбогдох байгууллагатай хамтран хэрэгжүүлэх;

19.2.4.эрхтэн, эд, эс шилжүүлэн суулгах үйл ажиллагааны нэгдсэн бүртгэл мэдээллийн санг ажиллуулах;

19.2.5.үндэсний хүлээх жагсаалтад реципиентийг бүртгэх.

19.3.Эрхтэн, эд, эс шилжүүлэн суулгах асуудал хариуцсан эрүүл мэндийн байгууллага сургалт, судалгаа, хамтын ажиллагааны чиглэлээр дараах үйл ажиллагааг хэрэгжүүлнэ:

19.3.1.эрхтэн, эд, эсийг шилжүүлэн суулгах тусламж, үйлчилгээний талаарх мэдээ, тайланг улсын хэмжээнд нэгтгэн гаргах, дүн шинжилгээ, судалгаа хийх, холбогдох төрийн байгууллагыг нотолгоонд суурилсан мэдээллээр хангах;

19.3.2.эрхтэн, эд, эс шилжүүлэн суулгах тусламж, үйлчилгээний чиглэлээр ижил төстэй үйл ажиллагаа эрхэлдэг олон улсын байгууллага, төрийн болон төрийн бус байгууллагатай хамтран ажиллах;

19.3.3.эмнэлгийн мэргэжилтнийг чадавхжуулах, багийн чадавхыг дээшлүүлэх;

19.3.4.эрхтэн, эд, эс шилжүүлэн суулгах тусламж, үйлчилгээнд орчин үеийн шинэ технологи, арга аргачлалыг нэвтрүүлэх, иргэн эх орондоо эмчлүүлэх нөхцөл бололцоог бүрдүүлэх үйл ажиллагааг дэмжин ажиллах.

19.4.Эрхтэн, эд, эс шилжүүлэн суулгах асуудал хариуцсан эрүүл мэндийн байгууллага амьгүй донорыг илрүүлэх, эрхтэн, эд, эс хуваарилах, зохицуулах чиглэлээр дараах үйл ажиллагааг хэрэгжүүлнэ:

19.4.1.Эрүүл мэндийн тухай хуулийн 15.1.7, 15.1.11, 15.1.13-т заасан байгууллагын амьгүй донорыг илрүүлэх, тархины үхэл тодорхойлох багт мэргэжил, арга зүйн зөвлөгөө өгөх;

19.4.2.улсын хэмжээнд амьгүй донорын тандалт хийх, илрүүлэх, бүртгэх тогтолцоог удирдан зохион байгуулж, байгууллага хоорондын уялдаа холбоог хангах, мэргэжил, арга зүйн зөвлөгөө өгөх, хяналт тавьж хамтран ажиллах;

19.4.3.амьгүй донорын гэр бүлтэй уулзах, эрхтэн, эд, эсийн донор болгох хүсэлт тавих;

19.4.4.реципиент болон донор эмнэлгийн хүчин чадал, чадамжийг сайжруулах, эмнэлгийн мэргэжилтнийг чадавхжуулах үйл ажиллагааг дэмжих, үр дүнг тооцох тогтолцоо бий болгох;

19.4.5.реципиент болон донор эмнэлэгтэй хамтран ажиллах гэрээг батлах, хэрэгжилтийг хянах, цуцлах.

19.5.Эрхтэн, эд, эс шилжүүлэн суулгах асуудал хариуцсан эрүүл мэндийн байгууллага ёс зүй, олон нийттэй харилцах чиглэлээр дараах үйл ажиллагааг хэрэгжүүлнэ:

19.5.1.эрхтэн, эд, эс шилжүүлэн суулгах тусламж, үйлчилгээ үзүүлж байгаа эрүүл мэндийн байгууллага, эмнэлгийн мэргэжилтний ёс зүйн хэм хэмжээнд хяналт тавьж Эрүүл мэндийн тухай хуулийн 26.1, 26.5-д заасан мэргэжил, ёс зүйн хороодтой хамтран ажиллах;

19.5.2.эрхтэн, эд, эсийг шилжүүлэн суулгах асуудлаар иргэн, хуулийн этгээдээс ирүүлсэн өргөдөл, гомдлыг шийдвэрлэх;

19.5.3.хүний наймаа болон хүний эрхтэн, эд, эсийн наймаатай холбоотой аливаа хууль зөрчсөн үйлдлийн талаар холбогдох хууль хяналтын байгууллагад мэдэгдэх;

19.5.4.эрхтэн, эд, эс шилжүүлэн суулгах тусламж, үйлчилгээний талаар иргэд, олон нийтэд үнэн зөв мэдээлэл өгөх, таниулах, ойлгуулах үйл ажиллагааг боловсролын болон хэвлэл мэдээллийн байгууллагатай хамтран зохион байгуулах;

19.5.5.хуульд заасан бусад үйл ажиллагаа.