Үйлчилгээний нөхцөл

1. Нийтлэг нөхцөл

ХуульTech үйлчилгээг «Содура Эй Ай Сольюшнс» ХХК (РД: 8430624, цаашид «бид») үзүүлнэ. Эдгээр нөхцөл нь чат, судалгаа, баримт бичиг, багийн ажиллагаа болон шалгалтын бэлтгэлийн үйлчилгээнд хамаарна. Үйлчилгээг ашиглах, бүртгэл үүсгэх, төлбөр хийхийн өмнө нөхцөлтэй танилцана уу. Байгууллагыг төлөөлөх бол та зохих эрхтэй байна. Тусад нь бичгээр байгуулсан гэрээнд өөрөөр тохирсон асуудлыг тухайн гэрээгээр зохицуулна.

2. Үйлчилгээний зориулалт ба AI үр дүн

ХуульTech нь судалгаа, боловсруулалт, баримт бичгийн төсөл бэлтгэхэд туслах программ хангамж юм. Үйлчилгээг ашигласнаар бид таны хуульч, өмгөөлөгч, төлөөлөгч болохгүй, өмгөөллийн гэрээ болон өмгөөлөгч–үйлчлүүлэгчийн харилцаа үүсэхгүй.

AI хариулт, эшлэл, тооцоо, орчуулга, хяналтын дүгнэлт, баримт бичгийн төсөл нь алдаатай, дутуу эсвэл хуучирсан байж болно. Үнэн зөв, бүрэн, тодорхой зорилгод нийцсэн байх, бүх эрсдэлийг илрүүлэх, хэрэг маргаан болон шалгалтад хүссэн үр дүнд хүрэхийг батлахгүй. Та ашиглахын өмнө эх сурвалж, хүчин төгөлдөр хууль, үйл баримт, харьяалал, хугацааг шалгана. Хуульч, өмгөөлөгч нь зөвлөгөө өгөх, гарын үсэг зурах, материал хүргүүлэхийн өмнө мэргэжлийн хяналт хийх үүргээ хадгална. Бид таны өмнөөс хугацаа хянах, материал илгээх үүрэг хүлээхгүй.

3. Оруулсан мэдээлэл ба нууцлал

Та материал оруулах, боловсруулах, шаардлагатай үйлчилгээ үзүүлэгчид дамжуулах хууль ёсны эрх, үндэслэлтэй байна. Өмгөөллийн нууц, хувийн болон эмзэг мэдээлэл оруулахын өмнө шаардлагатай зөвшөөрөл, түүний дотор хуульд заасан бичгээр өгөх зөвшөөрлийг авна. Шаардлагагүй таних мэдээллийг хасаж эсвэл халхална уу. Үйлчилгээнд мэдээлэл оруулах нь өөрөө өмгөөллийн нууцын хамгаалалтыг батлахгүй.

Та бидэнд материалаа үйлчилгээ үзүүлэхэд шаардлагатай хүрээнд боловсруулах, хадгалах, сонгосон хүлээн авагчид хүргэх хязгаарлагдмал зөвшөөрөл олгоно. Мэдээллийн ашиглалт, үйлчилгээ үзүүлэгч, хадгалалт, устгал болон таны эрхийг нууцлалын бодлогоор тайлбарлана. Эдгээр нөхцөлийг зөвшөөрөх нь хуульд тусгайлан шаардсан мэдээллийн эзний зөвшөөрлийг орлохгүй.

4. Данс, баг ба зөвшөөрөгдсөн хэрэглээ

Та бүртгэлийн мэдээллээ үнэн зөв байлгаж, данс, нэвтрэх мэдээлэл, баталгаажуулах кодоо хамгаална. Багийн гишүүн бүр өөрийн дансаар нэвтэрнэ. Материал хуваалцах, хамтын хэрэгт хавсаргах, хандалт олгох болон цуцлахдаа эрхийн хүрээг нягтална. Хандалт цуцлах нь өмнө татсан хуулбарыг буцаан татахгүй. Багийн гишүүнчлэл нь хувийн бүх материалыг хуваалцах зөвшөөрөл биш.

Бусдын эрх, нууцлалыг зөрчих, хамгаалалт болон төлбөрийн хязгаар тойрох, зөвшөөрөлгүй хандах, үйлчилгээг доголдуулах, залилан хийх, нотлох баримт хуурамчаар үйлдэх, AI үр дүнг албан ёсны шийдвэр эсвэл баталгаажсан эх сурвалж мэтээр танилцуулахыг хориглоно. Зөвшөөрөлгүй хандалт сэжиглэвэл бидэнд нэн даруй мэдэгдэнэ үү.

5. Материал ба оюуны өмч

Оруулсан материалын эрх танд эсвэл тухайн эрх эзэмшигчид хэвээр үлдэнэ. Та үүсгэсэн үр дүнг хууль ёсны хувийн болон мэргэжлийн ажилд ашиглах, засварлах, үйлчлүүлэгчид хүргүүлэх боломжтой. Гуравдагч этгээдийн эрхийг хүндэтгэнэ. AI үр дүн давхцах боломжтой бөгөөд онцгой эрх, зохиогчийн эрхийн хамгаалалтыг батлахгүй. ХуульTech-ийн программ, нэр, лого, интерфейсийн эрх холбогдох эрх эзэмшигчид үлдэнэ.

Чухал материалынхаа хуулбарыг өөрийн журмаар хадгална уу. Багц дуусах нь данс, өмнөх материалыг устгах үндэслэл биш. Өмнөх материал, экспортод хандахад өмчлөл болон хуваалцах эрхийн шалгалт хэвээр үйлчилнэ; шинэ AI ажил, материал нэмэх эрх нь багц, үлдэгдлээс хамаарна.

6. Үнэ, кредит, сунгалт ба цуцлалт

Худалдан авах үед харуулсан үнэ, хугацаа, кредит болон хэрэглээний нөхцөл тухайн гүйлгээнд үйлчилнэ. Бодит хэрэглээ нь ажлын төрөл, боловсруулалтын хэмжээнээс хамаарна; асуултын тооны жишээ нь ойролцоо. Ашиглаагүй кредит автоматаар дараагийн хугацаанд шилжихгүй. Нэмэлт кредитийн хугацааг худалдан авах үед харуулах бөгөөд дараагийн сунгалт түүний хугацааг автоматаар сунгахгүй.

Bonum-ийн сарын багц автоматаар сунгагдана. Та төлбөрийн хуудаснаас сунгалтыг цуцалж болно; амжилттай цуцалсны дараа дараагийн сунгалт зогсож, төлсөн хугацааны эрх хадгалагдана. QPay багц нь нэг удаагийн урьдчилсан төлбөртэй, автоматаар сунгагдахгүй. Хугацаанаас өмнө дахин QPay багц авахад шинэ хугацаа шууд эхэлж, өмнөх үлдсэн хугацааг орлоно. Багийн болон шалгалтын эрхэд тухайн саналын нөхцөл үйлчилнэ. Төлбөр баталгаажсаны дараа эрх идэвхжинэ.

7. Төлбөрийн гомдол ба буцаан олголт

Тохирсон ёсоор үзүүлсэн үйлчилгээний төлбөрийг зөвхөн бодлоо өөрчилсөн, эрхээ ашиглаагүй шалтгаанаар буцаахгүй. Сунгалт цуцлах нь өмнөх төлбөрийг автоматаар буцаахгүй. Давхар, буруу суутгал, идэвхжээгүй эрх болон үйлчилгээний доголдлын гомдлыг захиалгын дугаар, төлбөрийн баримттай ирүүлнэ үү. Залруулга, эрх нөхөн олголт, буцаалт нь тухайн нөхцөл болон холбогдох хуулиас хамаарна. Энэ заалт нь хуульд заасан зайлшгүй эдлэх эрх, доголдлыг арилгуулах болон бусад шаардлага гаргах эрхийг хязгаарлахгүй.

8. Ажиллагаа, хязгаарлалт ба өөрчлөлт

Үйлчилгээ тасралтгүй, алдаагүй ажиллахыг батлахгүй. Засвар, сүлжээ, эх сурвалж болон бусад үйлчилгээний саатал гарч болно. Хууль бус хэрэглээ, аюулгүй байдлын эрсдэл, эдгээр нөхцөлийн зөрчлийн үед шаардлагатай хандалтыг хязгаарлах, түдгэлзүүлэх, цуцлах эрхтэй. Хууль, аюулгүй байдлын шаардлага зөвшөөрөх хүрээнд шалтгааныг мэдэгдэх бөгөөд та хянуулах хүсэлт гаргаж болно.

Бид үйлчилгээ болон нөхцөлийг шинэчилж болно. Шинэчилсэн хувилбар, хэрэгжих огноог нийтэлж, хэрэглэгчийн эрхийг хөндсөн материаллаг өөрчлөлтийг хэрэгжихээс өмнө мэдэгдэнэ. Хуульд шаардсан зөвшөөрлийг тусад нь авна. Өөрчлөлтийг өмнөх үйлдэлд буцаан хэрэглэхгүй, төлсөн хугацааны тохирсон эрхийг үндэслэлгүйгээр дордуулахгүй. Үнэ, багцын өөрчлөлтийг дараагийн худалдан авалт, сунгалтаас өмнө танилцуулна.

9. Хариуцлагын хязгаарлалт

Хуулиар зөвшөөрсөн дээд хэмжээнд, бидний гэрээний болон хуульд заасан үүргийн зөрчлөөс шалтгаалаагүй дараах нөхцөлөөс үүссэн хохирол, зардал, шаардлага болон бусад сөрөг үр дагаврыг бид хариуцахгүй:

• AI үр дүнг эх сурвалж, үйл баримттай тулгалгүйгээр, шаардлагатай мэргэжлийн хяналтгүйгээр ашигласан шийдвэр, зөвлөгөө, баримт бичиг;
• хэрэглэгчийн өгсөн буруу, дутуу, хуучирсан мэдээлэл, эсвэл ашиглах эрхгүй материал;
• хэрэглэгч хугацаа хянаагүй, материал илгээх болон эрхээ хэрэгжүүлэх ажиллагааг хугацаанд нь хийгээгүй байх;
• хэрэглэгч нэвтрэх мэдээллээ бусдад өгөх, зөвшөөрөлгүй материал оруулах, хуваалцах, хандалт олгох;
• үйлчилгээнээс гадуурх өөрчлөлт, хууль бус хэрэглээ, AI үр дүнг төөрөгдүүлэн танилцуулах.

Эдгээр хязгаарлалт нь бидний санаатай буюу хэт болгоомжгүй үйлдэл, өөрсдийн гэрээний зөрчил, мэдээлэл хамгаалах үүрэг болон хуулиар хязгаарлаж үл болох хариуцлагыг үгүйсгэхгүй. Аль нэг заалт хүчин төгөлдөр бус бол холбогдох хууль үйлчилж, бусад хүчин төгөлдөр заалт хэвээр үлдэнэ.

10. Холбоо барих ба маргаан

Асуулт, гомдлыг «Содура Эй Ай Сольюшнс» ХХК-д eba@huuli.tech эсвэл 80181240 дугаараар гаргана. Нууц үг, баталгаажуулах код, картын бүрэн мэдээлэл, үйлчлүүлэгчийн нууц материалыг гомдолд бүү хавсаргана уу.

Монгол Улсын хууль тогтоомж үйлчилнэ. Маргааныг харилцан тохиролцож, шийдэгдээгүй бол хуульд заасан харьяаллын дагуу Монгол Улсын шүүхээр шийдвэрлүүлнэ. Эрх бүхий байгууллагад гомдол гаргах, шүүхэд хандах эрхийг эдгээр нөхцөл хязгаарлахгүй.