Тогтоол №455

ХЭРГИЙН ТАНИЛЦУУЛГА: Нэхэмжлэгч нь ажлаас чөлөөлөгдөөгүй байхад нь нэг удаагийн тэтгэлэг олгох тухай тушаал гаргаж эрх зүйн байдлыг дордуулсан, учирсан хохирлоо барагдуулах, нийгмийн даатгалаа нөхөн төлүүлэх, шүүх маргааны зардлыг гаргуулах гэсэн үндэслэлээр нэхэмжлэл гаргасан. Хариуцагч нь нэхэмжлэлийн шаардлагыг хэрэгсэхгүй болгуулахээр тайлбар гаргасан. АНХАН ШАТ: Нэхэмжлэлийг бүхэлд нь хэрэгсэхгүй болгож шийдвэрлэсэн. ДАВЖ ЗААЛДАХ ШАТ: Нэхэмжлэгчийн гомдлыг хангахгүй орхиж, анхан шатны шүүхийн шийдвэрийг хэвээр үлдээсэн. ХЯНАЛТЫН ШАТ: Анхан болон давж заалдах шатны шүүхүүд хэргийн бодит байдлыг зөв тодруулж, хуулийг зөв хэрэглэсэн, хэрэг хянан шийдвэрлэх ажиллагааны журмыг зөрчөөгүй гэж үзэж, нэхэмжлэгчийн хяналтын гомдлыг хангахгүй орхисон. ҮНДЭСЛЭЛ:

1. Нэхэмжлэгчийг ажлаас чөлөөлсөнтэй холбогдуулан Төрийн албаны тухай хуулийн 27.2.4-т заасан төрийн жинхэнэ албан хаагчийн баталгааг хангахтай холбогдсон шийдвэр гаргахыг хариуцагчид даалгасан нь буюу албан тушаал нь хасагдсан тохиолдолд улирлын цалинтай тэнцэх тэтгэлэг олгох шийдвэр нь хууль зөрчөөгүй, нэхэмжлэгчийн эрх, хууль ёсны ашиг сонирхлыг хөндөөгүй.
2. Ажлаас чөлөөлөгдөөгүй байхад нэг удаагийн тэтгэлэг олгох тушаал гаргаж эрх зүйн байдлыг дордуулсан гэх нэхэмжлэгчийн тайлбар, гомдол нь үндэслэлгүй.
3. 6 сарын чөлөө олгосон захиргааны шийдвэр нь Төрийн албаны тухай хуулийн 23.3.2-т үндэслэлтэй байсан ч, тухайн үед захиргааны чөлөөтэй байсан төрийн жинхэнэ албан хаагчийг ажлын байр, албан тушаал нь өөрөөс үл хамаарах шалтгаанаар хасагдсан тохиолдолд төрийн албан хаагчийн баталгааг хангах талаар арга хэмжээ аваагүй эс үйлдлийг буруутгаж, нэмэгдэл баталгааг нь эдлүүлэхээр шийдвэрлэсэн нь зөв.
4. Нэхэмжлэгч нь захиргааны чөлөөний хугацаанд өөр ажил эрхэлж байсан нь тогтоогдсон тул Төрийн албаны тухай хуулийн 23.3.2-т заасанд хамаарахгүй гэж үзсэн нь хууль зөрчөөгүй.
5. Хариуцагч нь шүүхийн шийдвэрийг зохих ёсоор биелүүлээгүй гэж үзэх үндэслэлгүй, Төрийн албаны тухай хуулийн 27.2.4-т заасан "эсхүл" гэх үг нь хангагдах аль боломжтойг нь сонгож хэрэглэх эрхийг хариуцагчид олгосон.
6. Нэхэмжлэгчийн ажилгүй байсан хугацааны цалин, нийгмийн даатгал, шүүх маргааны зардлыг гаргуулах шаардлагуудыг хэрэгсэхгүй болгосон нь үндэслэлтэй.