Тогтоол №910

ХЭРГИЙН ТАНИЛЦУУЛГА: Нэхэмжлэгч ХХК нь Ашигт малтмалын газраас хайгуулын тусгай зөвшөөрөл олгох сонгон шалгаруулалтаар гуравдагч этгээд ХХК-ийг шалгаруулсан дүгнэлт болон холбогдох захиргааны акт, шийдвэрүүдийг хууль бус хэмээн хүчингүй болгуулахаар нэхэмжилжээ. Маргаан нь тусгай зөвшөөрөл олгох сонгон шалгаруулалтын үнэлгээний журмын хуулийн зорилго, агуулгад нийцэх эсэхэд төвлөрсөн.

АНХАН ШАТ: Анхан шатны шүүх нэхэмжлэлийг хангаж, Сонгон шалгаруулалтын комиссын гуравдагч этгээдийг шалгаруулсан дүгнэлт, Ашигт малтмалын газрын даргын тушаал, Кадастрын хэлтсийн даргын шийдвэрийг хүчингүй болгосон. Мөн нэхэмжлэгчийн саналыг хуулийн дагуу шийдвэрлэхийг хариуцагчид даалгасан бөгөөд Ашигт малтмалын тухай хуулийн заалтуудыг үндэслэжээ.

ДАВЖ ЗААЛДАХ ШАТ: Хариуцагч Ашигт малтмалын газрын Кадастрын хэлтсийн даргын үүргийг түр орлон гүйцэтгэгч нь анхан шатны шүүхийн шийдвэрийг эс зөвшөөрч гомдол гаргасан. Анхан шатны шүүх хуулийг буруу тайлбарлаж, Уул уурхайн сайдын тушаалаар батлагдсан үнэлгээний шалгуурыг зөрүүтэй гэж үзсэн нь үндэслэлгүй, мөн гуравдагч этгээд нь мэргэжлийн боловсон хүчин, тоног төхөөрөмжгүй гэх дүгнэлт буруу гэж тайлбарласан. Давж заалдах шатны шүүх анхан шатны шүүхийн шийдвэрийн тогтоох хэсгийн хуулийн зүйл заалтын бичлэгийг зөвтгөн өөрчилж, бусад заалтуудыг хэвээр үлдээх шийдвэр гаргасан.

ҮНДЭСЛЭЛ: Ашигт малтмалын тухай хуулийн дагуу хайгуулын тусгай зөвшөөрөл олгох сонгон шалгаруулалтын гол зорилго нь тухайн үйл ажиллагааг мэргэжлийн түвшинд хамгийн сайн гүйцэтгэх чадвартай этгээдийг сонгоход оршино. Иймд мэргэжлийн боловсон хүчнээр хангагдсан байдал нь сонгон шалгаруулалтын үндсэн үзүүлэлт байх ёстой. Харин Уул уурхайн сайдын тушаалаар баталсан журамд "Хамгийн өндөр үнийн санал ирүүлсэн оролцогчид нийт үнэлгээний 50 хувийн оноог өгнө" гэж заасан нь Ашигт малтмалын тухай хуулийн агуулга, зорилгод нийцэхгүй байна. Сонгон шалгаруулалтын комисс нь энэхүү хууль бус журмыг баримтлан, саяхан байгуулагдсан, мэргэжлийн боловсон хүчин, техник хэрэгслийн хувьд "хамгийн сайн" гэж үнэлэгдээгүй гуравдагч этгээдийг (үнэний саналд өндөр оноо өгсөн) шалгаруулж, тусгай зөвшөөрөл олгосон нь хууль бус юм. Захиргааны байгууллагын үйл ажиллагаа нь хууль дээдлэх, шударга ёсны зарчимд үндэслэн зорилгодоо нийцсэн байх ёстой тул анхан шатны шүүхийн шийдвэр хууль зүйн үндэслэлтэй байна.