Тогтоол №805

ХЭРГИЙН ТАНИЛЦУУЛГА: Нэхэмжлэгч компани нь татварын улсын байцаагчдын нөхөн татвар ногдуулсан актын хавсралтын хэсгийг хүчингүй болгуулахаар нэхэмжилжээ. Тус компани нэгэн компанийн НӨАТ-ын падааныг ашиглан НӨАТ-ын буцаан авалтын дүнг нэмэгдүүлснийг татварын байцаагчид хууль зөрчсөн гэж үзэн нөхөн татвар ногдуулсан байна. Нэхэмжлэгч нь уг падааныг шүүхийн шийдвэрээр хуурамч гэж тогтоогдоогүй тул нөхөн татварыг хүчингүй болгуулахыг шаарджээ.

АНХАН ШАТ: Анхан шатны шүүх нэхэмжлэлийн шаардлагыг Татварын ерөнхий хуулийн 29.1.1, 74.1, 74.1.3, Нэмэгдсэн өртгийн албан татварын тухай хуулийн 14.3, Нягтлан бодох бүртгэлийн тухай хуулийн 4.1.2-т заасан үндэслэлээр хэрэгсэхгүй болгосон.

ДАВЖ ЗААЛДАХ ШАТ: Нэхэмжлэгч анхан шатны шүүхийн шийдвэрийг эс зөвшөөрч давж заалдах гомдол гаргасан. Нэхэмжлэгч нь падааныг шүүхийн шийдвэрээр хуурамч гэж тогтоогоогүй байхад НӨАТ-ын буцаан авалтыг бууруулсан нь үндэслэлгүй, мөн НӨАТ-ын тухай хуулийн 14.3 дугаар зүйлийг буруу тайлбарласан гэж үзсэн.

ҮНДЭСЛЭЛ: Давж заалдах шатны шүүх анхан шатны шүүхийн шийдвэрийг хэвээр үлдээсэн. Нэхэмжлэгчийн худалдан авсан гэх барааны гүйлгээнд ногдох НӨАТ-ыг төсөвт төлсөн нь хэрэг хянан шийдвэрлэх ажиллагаагаар тогтоогдоогүй. НӨАТ-ын тухай хуулийн 14.3-т зааснаар албан татвар төлсөн нь баримтад тусгагдаагүй бол хасч тооцохгүй. Нэхэмжлэгчийн бодит худалдан авалт хийсэн гэх маргаан нь санхүүгийн анхан шатны баримтуудаар нотлогдоогүй бөгөөд худалдаа хийсэн компанийн захирлын "хий бичилттэй НӨАТ-ын падаан зардаг байсан" гэх мэдүүлгээр үгүйсгэгдсэн. Иймд НӨАТ-ын падаан нь "хий бичилттэй" гэсэн дүгнэлт нотлох баримтад тулгуурласан нь зөв.