Тогтоол №771

ХЭРГИЙН ТАНИЛЦУУЛГА: МАН-аас нэр дэвшсэн С.г бүртгэхээс Увс аймгийн Сонгуулийн хороо татгалзсан нь маргаан үүсгэжээ. Нэхэмжлэгч С. Монгол Ардын Хувьсгалт Намаас дүрмийн дагуу гарч, Монгол Ардын Намд элссэн боловч Сонгуулийн хороо түүнийг МАХН-ын гишүүн хэвээр гэж үзэн, нэг намын гишүүнийг өөр намаас нэр дэвшүүлэхийг хориглосон хуулийн заалтыг зөрчсөн гэж шийдвэрлэсэн.

АНХАН ШАТ: Анхан шатны шүүх нэхэмжлэлийг бүрэн хангаж, Сонгуулийн хорооны нэр дэвшигчийг бүртгэхээс татгалзсан тогтоолыг хүчингүй болгон, С.*******г нэр дэвшигчээр бүртгэхийг даалгасан.

ДАВЖ ЗААЛДАХ ШАТ: Хариуцагч Сонгуулийн хороо анхан шатны шүүхийн шийдвэрийг хэрэг хянан шийдвэрлэх ажиллагааны дутуу, нотлох баримтыг үнэлээгүй, нэг талыг барьсан гэх үндэслэлээр давж заалдсан. Давж заалдах шатны шүүх хариуцагчийн гомдлыг хангахгүй орхиж, анхан шатны шүүхийн тогтоох хэсгийн хуулийн зүйл заалтын тодорхойлолтод залруулга хийн, бусад заалтыг хэвээр үлдээв.

ҮНДЭСЛЭЛ: Шүүх С.******* нь МАХН-ын дүрмийн дагуу намаас гарч, мөн өдөр МАН-д элссэн нь баримтаар тогтоогдсон гэж үзэв. Намд элсэх, гарах нь Үндсэн хуулиар баталгаажсан иргэний сайн дурын эрх бөгөөд үүнийг аливаа байгууллагын шийдвэрээр хязгаарлахгүй. Иймд Сонгуулийн хороо түүнийг нэг намын гишүүнийг өөр намаас нэр дэвшүүлэхийг хориглосон Сонгуулийн хуулийн 154.6 дахь хэсгийг зөрчсөн гэж үзэн, нэр дэвшигчээр бүртгэхээс татгалзсан нь хууль буруу хэрэглэсэн байна.