Тогтоол №3304

ХЭРГИЙН ТАНИЛЦУУЛГА: Ажил үүргээ биелүүлээгүй, албан тушаалын эрх мэдлээ хэтрүүлсэн үндэслэлээр төрийн албанаас халагдсан албан тушаалтан өөрийгөө эгүүлэн тогтоолгох, олговор гаргуулах нэхэмжлэл гаргасан. АНХАН ШАТ: Төрийн албаны тухай хуулийн холбогдох зүйл заалтыг үндэслэн захиргааны актыг хүчингүй болгож, албан тушаалтанг эгүүлэн тогтоож, олговор гаргуулах шийдвэр гаргасан. ДАВЖ ЗААЛДАХ ШАТ: Хариуцагч нь анхан шатны шүүх нотлох баримтыг бүх талаас нь үнэлж дүгнэлгүй шийдвэр гаргасан гэж гомдол гаргасан. Хариуцагчийн итгэмжлэгдсэн төлөөлөгч нь албан тушаалтны буруутай үйлдлүүдийг дурдаж, төрийн албанаас халах үндэслэл болгосон.

ҮНДЭСЛЭЛ: Хариуцагч нь албан тушаалтны зөрчлийг шалгаж тогтоогоогүй, ямар үйлдлийг зөрчилд тооцсон нь тодорхойгүй байхад, иргэдээс ирүүлсэн шаардлагад дурдсан үндэслэлээр шууд сахилгын шийтгэл ногдуулсан нь Захиргааны ерөнхий хуулийн зорилго болон бодит нөхцөл байдалд нийцсэн, үндэслэл бүхий шийдвэр гаргах зарчимд нийцээгүй байна. Урьд өмнө ногдуулсан сахилгын шийтгэлд давхар шийтгэл хүлээлгэх боломжгүй, дахин зөрчил гаргасныг шалгаж тогтоогоогүй тул маргаан бүхий захиргааны акт хууль ёсны болж чадаагүй байна.