Тогтоол №2271

ХЭРГИЙН ТАНИЛЦУУЛГА: Нэхэмжлэгч нь захиргааны байгууллагын даргын гаргасан захирамжийг хууль бус болохыг тогтоолгож, өмнө эрхэлж байсан албан тушаалдаа эгүүлэн тогтоолгож, ажилгүй байсан хугацааны нөхөн олговор, даатгалыг төлүүлэхээр шаардсан. АНХАН ШАТ: Нэхэмжлэлийг хангаж, даргын захирамжийг хууль бус болохыг тогтоож, нэхэмжлэгчийг өмнө эрхэлж байсан албан тушаалд эгүүлэн тогтоож, ажилгүй байсан хугацааны цалинтай тэнцэх хэмжээний нөхөн олговор, даатгалыг нөхөн төлөхийг даалгасан. ДАВЖ ЗААЛДАХ ШАТ: Хариуцагч нь анхан шатны шүүхийн шийдвэрийг эс зөвшөөрч гомдол гаргасан. Гомдолд дурдсанаар, нэхэмжлэгчийг томилохдоо хууль зөрчсөн, түр томилох гэсэн ойлголт байхгүй, журмыг зөрчсөн, шүүх хууль бус шийдвэрийг зөвтгөсөн гэж үзсэн.

ҮНДЭСЛЭЛ: Захиргааны байгууллагын даргын нарийн бичгийн даргыг томилох, чөлөөлөх эрх нь даргын биш Тэргүүлэгчдийн хуралд олгогдсон. Нэхэмжлэгчийг ажлаас чөлөөлсөн захирамж нь хуультай нийцэхгүй боловч, энэ захирамжаас үүдэн нэхэмжлэгчийн эрх, хууль ёсны ашиг сонирхол зөрчигдөөгүй, мөн нэхэмжлэгч нь хуульд заасан үндэслэлгүй, түр томилогдсон албан тушаалтан тул түүний эрх хамгаалагдахгүй. Анхан шатны шүүх нь нэхэмжлэгчийн эрх ашиг зөрчигдсөн эсэх, хуулийн дагуу томилогдсон эсэх талаар дүгнэлт хийгээгүйгээс шүүхийн шийдвэр хууль ёсны бөгөөд үндэслэл бүхий байх шаардлагад нийцээгүй. Иймд анхан шатны шүүхийн шийдвэрийг хүчингүй болгож, нэхэмжлэлийг бүхэлд нь хэрэгсэхгүй болгож, хариуцагчийн давж заалдах гомдлыг хангасан.