Тогтоол №1256

ХЭРГИЙН ТАНИЛЦУУЛГА: Нэхэмжлэгчийг сумын эмнэлгийн эрхлэгч эмчийн албан тушаалаас Засаг даргын захирамжаар чөлөөлж, сахилгын шийтгэл ногдуулсанд нэхэмжлэгч захирамжуудыг хүчингүй болгож, албан тушаалд эгүүлэн тогтоож, олговор гаргуулахыг шаардсан. Хариуцагч нь маргааныг иргэний хэргийн харьяалалд хамаарна гэж, мөн нэхэмжлэгчийг хууль ёсны үндэслэлээр ажлаас халсан гэж маргасан.

АНХАН ШАТ: Засаг даргын сахилгын шийтгэл ногдуулсан болон ажлаас чөлөөлсөн захирамжуудыг хүчингүй болгож, нэхэмжлэгчийг албан тушаалд нь эгүүлэн тогтоож, ажилгүй байсан хугацааны олговор гаргуулахаар шийдвэрлэсэн. Нэг захирамжийг хүчингүй болгуулах шаардлагыг хэрэгсэхгүй болгосон. (Засаг захиргаа, нутаг дэвсгэрийн нэгж, түүний удирдлагын тухай хууль, Хөдөлмөрийн тухай хууль, Төрийн албаны тухай хуулийн холбогдох заалтуудыг баримталсан).

ДАВЖ ЗААЛДАХ ШАТ: Хариуцагч нь анхан шатны шүүх хэргийн харьяаллыг зөрчиж, шүүх хуралдааны журмыг алдаж, нэхэмжлэгчийг хууль бусаар томилсон, сахилгын зөрчил гаргасан тул ажлаас халах үндэслэлтэй байсан гэж гомдол гаргасан. Давж заалдах шатны шүүх анхан шатны шүүхийн шийдвэрийн тогтоох хэсгийн олговор, улсын тэмдэгтийн хураамж гаргуулах талын заалтуудыг Засаг даргын Тамгын газраас гаргуулахаар өөрчилж, бусад заалтыг хэвээр үлдээсэн.

ҮНДЭСЛЭЛ: Нэхэмжлэгчийг ээлжийн амралтаа авах үед сахилгын зөрчил гаргасан болон ажлаас чөлөөлөх хэмжээний ёс зүйн зөрчил, ажил хангалтгүй гүйцэтгэсэн нь тогтоогдоогүй. Нэхэмжлэгч нь төрийн үйлчилгээний албан хаагч тул Засаг даргын гаргасан акт нь захиргааны акт бөгөөд захиргааны хэргийн шүүх харьяалах нь зөв. Шүүх хуралдааны журмыг зөрчсөн гэх хариуцагчийн гомдол үндэслэлгүй. Харин төрийн албан тушаалтны хууль тогтоомж зөрчсөн алдааны улмаас учирсан хохирлыг төр хариуцах зарчмын дагуу олговор, улсын тэмдэгтийн хураамжийг Засаг даргын Тамгын газраас гаргуулахаар шийдвэрт өөрчлөлт оруулсан.