Тогтоол №1238

ХЭРГИЙН ТАНИЛЦУУЛГА: Нэхэмжлэгч нь тэтгэвэр тогтоолгох насанд хүрсэн гэх үндэслэлээр албан тушаалаас чөлөөлсөн захирамжийг хууль бус болохыг тогтоолгож, ажилд эгүүлэн томилуулах, ажилгүй байсан хугацааны цалин болон даатгалын шимтгэлийг нөхөн гаргуулах шаардлага гаргасан. Нэхэмжлэгч захирамж гарах үед 59 нас 6 сар 6 хоногтой байсан.

АНХАН ШАТ: Шүүх нэхэмжлэгчийн шаардлагыг бүхэлд нь хангаж, захирамжийг хүчингүй болгож, нэхэмжлэгчийг урьд эрхэлж байсан албан тушаалд эгүүлэн тогтоож, ажилгүй байсан хугацааны цалин гаргуулахаар шийдвэрлэсэн. Үндэслэл нь Захиргааны Ерөнхий хууль, Төрийн албаны тухай хууль, Нийгмийн даатгалын сангаас олгох тэтгэвэр, тэтгэмжийн тухай хууль, Хөдөлмөрийн тухай хуулийн холбогдох заалтууд байв.

ДАВЖ ЗААЛДАХ ШАТ: Хариуцагчийн итгэмжлэгдсэн төлөөлөгч анхан шатны шүүхийн шийдвэр хууль ёсны бөгөөд үндэслэл бүхий биш гэж үзэж гомдол гаргасан. Гомдолдоо: Нэхэмжлэгч тэтгэвэр тогтоолгох насанд хүрсэн тул чөлөөлөх үндэслэлтэй; анхан шатны шүүх Хөдөлмөрийн тухай хуулийг буруу хэрэглэж, тэтгэвэр тогтоолгох насыг буруу тодорхойлсон. Мөн ажилгүй байсан хугацааны цалин хөлсийг тооцохдоо хуульд заасан суутгалыг хасаагүй, хоолны үнийн хөнгөлөлтийг дундаж цалинд оруулсан нь буруу гэж үзсэн.

ҮНДЭСЛЭЛ: Давж заалдах шатны шүүх нь хариуцагчийн гомдлын зарим хэсгийг хангаж шийдвэрт өөрчлөлт оруулсан. Нийгмийн даатгалын сангаас олгох тэтгэвэр, тэтгэмжийн тухай хуулийн 4.1-д зааснаар эмэгтэй 55 нас хүрээд өөрөө хүсвэл тэтгэвэр тогтоолгох боловч энэ нь захиргааны санаачилгаар 60 нас хүрээгүй нэхэмжлэгчийг албан тушаалаас чөлөөлөх үндэслэл болохгүй тул анхан шатны шүүх хуулийг зөв тайлбарласан байна. Харин анхан шатны шүүх маргаантай харилцааг зохицуулахад хамаарахгүй Хөдөлмөрийн тухай хуулийн заалтыг хэрэглэсэн нь буруу байсан тул уг заалтыг шийдвэрээс хасч, нэхэмжлэгчийн ажилгүй байсан хугацааны цалин хөлсийг тооцохдоо хоолны үнийн хөнгөлөлтийг дундаж цалинд оруулсан нь журам зөрчсөн тул тооцоолсон дүнг өөрчилж шийдвэрлэв.