Тогтоол №2914

ХЭРГИЙН ТАНИЛЦУУЛГА: Төрийн албаны тухай хууль болон Хөдөлмөрийн тухай хуулийг зөрчин, жирэмсний амралттай байсан төрийн албан хаагчийг орон тоо хасагдсан гэх үндэслэлээр ажлаас чөлөөлсөн нь хууль бус болохыг тогтоолгож, урьд эрхэлж байсан албан тушаалтай дүйцэхүйц албанд эгүүлэн томилж, ажилгүй байсан хугацааны цалин, шимтгэлийг гаргуулахаар нэхэмжлэгч шүүхэд хандсан. Хариуцагч нь бүтцийн өөрчлөлт, орон тоо хасагдсан тул албан тушаалаас чөлөөлсөн, өөр ажлын байр санал болгосон гэж маргасан. АНХАН ШАТ: Нэхэмжлэлийг бүхэлд нь хангаж, төрийн албан хаагчийг ажлаас чөлөөлсөн тушаалыг хүчингүй болгож, урьд эрхэлж байсан албан тушаалтай дүйцэхүйц албан тушаалд эгүүлэн томилж, ажилгүй байсан хугацааны цалин, хөлсийг тооцож олгох, нийгмийн болон эрүүл мэндийн даатгалын дэвтэрт нөхөн бичилт хийхийг даалгасан.

ҮНДЭСЛЭЛ: Хөдөлмөрийн тухай хуулийн 100 дугаар зүйлийн 100.1-д заасны дагуу байгууллага бүхэлдээ татан буугдаагүй тохиолдолд жирэмсэн эмэгтэй, бага насны хүүхэдтэй эхийг ажлаас халахыг хориглосон. Байгууллагын бүтэц өөрчлөгдөж, орон тоо хасагдсан нь Хөдөлмөрийн тухай хуулийн 100.1-д заасан аж ахуйн нэгж, байгууллага татан буугдсан гэх үндэслэлд хамаарахгүй. Байгууллага татан буугдаагүй байхад орон тоо хасагдсан гэх үндэслэлээр бага насны хүүхэдтэй эхийг ажлаас чөлөөлсөн нь хууль зөрчсөн. Нэхэмжлэгчийн өмнө эрхэлж байсан ажилтай дүйцэхүйц албан тушаалд томилох боломжтой байсан.