Тогтоол №10890

ХЭРГИЙН ТАНИЛЦУУЛГА: Иргэн Я.С нь өөрийн өмчлөлийн орон сууцыг барьцаанаас чөлөөлөх бүртгэл хийхээс татгалзсан улсын бүртгэгчийн мэдэгдлийг хүчингүй болгож, бүртгэл хийхийг даалгах тухай нэхэмжлэл гаргажээ. Нэхэмжлэгч нь гэрээний дагуу орон сууц худалдан авч төлбөрийг бүрэн барагдуулсан, шүүхийн шийдвэрээр өмчлөгчөөр тогтоогдсон боловч тус орон сууц нь өмнө нь "М" ХХК-аас "К" ХХК-д барьцаалагдсан байжээ. Хариуцагч нь иргэний хэрэг хянан шийдвэрлэгдэж байгаа, барьцааны эрхийг дуусгавар болгох хүсэлт ирээгүй гэх үндэслэлээр бүртгэхээс татгалзсан. Гуравдагч этгээд "М" ХХК нь нэхэмжлэлийг хүлээн зөвшөөрсөн бол "К" ХХК нь нэхэмжлэлийг эс зөвшөөрч, Я.С-ийн эрх ашгийг зөрчсөн хууль бус хэлцэл гэж тайлбарлажээ.

АНХАН ШАТ: Нэхэмжлэлийн шаардлагыг бүхэлд нь хангаж, улсын бүртгэгчийн татгалзсан мэдэгдлийг хүчингүй болгож, орон сууцыг барьцаанаас чөлөөлсөн бүртгэл хийхийг хариуцагч байгууллагад даалгасан.

ҮНДЭСЛЭЛ: Иргэний хэргийн шүүхээс Я.С-ийг тухайн орон сууцны өмчлөгчөөр тогтоож, захиргааны хэргийн шүүхийн шийдвэрээр өмнөх бүртгэлийг хүчингүй болгон Я.С-ийн өмчлөлд бүртгэж, гэрчилгээ олгохыг даалгасан шүүхийн шийдвэрүүд хүчин төгөлдөр болсон. "М" ХХК болон "К" ХХК-ийн хооронд байгуулсан барьцааны гэрээнд Я.С оролцоогүй, түүнд мэдэгдэлгүйгээр барьцаалсан нь хууль бус. Нэхэмжлэгч нь "К" ХХК-тай ямар нэгэн зээлийн харилцаанд ороогүй, барьцааны гэрээнд эрх үүрэг хүлээгээгүй тул түүний орон сууцны хувьд барьцааны эрх дуусгавар болсон. Иймд зээлийн маргаан шүүхэд хянан шийдвэрлэгдэж байгаа гэх үндэслэлээр барьцаанаас чөлөөлсөн бүртгэл хийхээс татгалзсан нь хууль бус бөгөөд нэхэмжлэгчийн эрх ашгийг зөрчсөн.