Тогтоол №28190

ХЭРГИЙН ТАНИЛЦУУЛГА: Иргэн Ц.Б нь Т ББСБ ХХК-тай 25,000,000 төгрөгийн зээлийн гэрээ, мөн үүргээ биелүүлээгүй тохиолдолд барьцаалсан автомашинаар гүйцэтгэлийг хангуулах фидуцийн гэрээ байгуулсан. Хугацаа хэтрүүлсний улмаас үндсэн зээл, хүү, нэмэгдүүлсэн хүүгийн хамт 28,817,333 төгрөгийг төлөөгүй тул Т ББСБ ХХК нь шүүхэд нэхэмжлэл гаргажээ.

АНХАН ШАТ: Иргэний хуулийн холбогдох зүйл заалтуудыг үндэслэн хариуцагчаас 28,817,333 төгрөгийг гаргуулж, төлөөгүй тохиолдолд фидуцийн гэрээний автомашинаар үүргийн гүйцэтгэлийг хангуулахаар шийдвэрлэсэн.

ДАВЖ ЗААЛДАХ ШАТ: Хариуцагч нь шийдвэрт заасан дүнг хэт өндөр хэмээн үзэж гомдол гаргасан. Давж заалдах шатны шүүх хэргийг бүхэлд нь хянан, анхан шатны шүүхийн шийдвэрт өөрчлөлт оруулж, фидуцийн гэрээний дагуу автомашинаар үүргийн гүйцэтгэлийг хангуулах хэсгийг хууль зүйн үндэслэлгүй гэж үзэн хэрэгсэхгүй болгосон.

ҮНДЭСЛЭЛ: Фидуцийн гэрээ нь Иргэний хуулийн 235-р зүйлийн 235.1, 235.4-т заасны дагуу үүрэг гүйцэтгэгч үүргээ биелүүлээгүй тохиолдолд эд хөрөнгийг бодитоор гаргуулан авснаар үүрэг дуусгавар болдог. Шүүх анх нэхэмжлэлийн шаардлагын мөнгийг гаргуулахаар шийдвэрлэсэн байтал үүргээ биелүүлээгүй тохиолдолд фидуцийн хөрөнгөөр гүйцэтгэлийг хангуулахаар заасан нь хуульд нийцэхгүй байна. Талуудын хооронд байгуулагдсан зээлийн гэрээний хүү, нэмэгдүүлсэн хүү нь хуульд нийцсэн бөгөөд нэхэмжлэгч тал шаардлагаа гэрээний хугацааны хүүгээс хэтрүүлээгүй байна.