Тогтоол №20660

ХЭРГИЙН ТАНИЛЦУУЛГА: Нэг тал гэрэлт самбар хийлгэх гэрээ байгуулж, төлбөр хийсэн боловч хийгдсэн самбар нь баталгаат хугацаандаа гэмтсэн, засагдаагүй тул гэрээ цуцалж, төлбөрийг буцаан шаардсан. Нөгөө тал нь чанартай гүйцэтгэсэн, гэмтэл нь байгалийн хүчин зүйлээс болсон, өөрөө засварлах санал тавьсан ч захиалагч зөвшөөрөөгүй тул нэхэмжлэлийг хүлээн авах боломжгүй гэж маргажээ. АНХАН ШАТ: Ажил гүйцэтгэх гэрээний үүргийн зөрчил, доголдлыг арилгах зардлыг үндэслэн хариуцагчаас нэхэмжлэгчид мөнгө гаргуулах шийдвэр гаргасан. ДАВЖ ЗААЛДАХ ШАТ: Гэрээний хугацаа хожимдуулсан, гэмтэл нотлогдоогүй, гэрэл шатсан нь тогны хэлбэлзлээс болсон гэх хариуцагчийн гомдлыг үндэслэлгүй гэж үзэн анхан шатны шүүхийн шийдвэрийг хэвээр үлдээсэн.

ҮНДЭСЛЭЛ: Талуудын хооронд байгуулсан ажил гүйцэтгэх гэрээ нь Иргэний хуулийн 343 дугаар зүйлд заасан ажил гүйцэтгэх гэрээ байх бөгөөд гүйцэтгэсэн ажил нь баталгаат хугацаандаа доголдолтой байсан, доголдлыг арилгуулах хугацаанд гүйцэтгэгч арга хэмжээ аваагүй болох нь нотлогдсон. Гүйцэтгэгч нь захиалагчийн өмчлөлд ямар нэгэн доголдолгүй үр дүн шилжүүлэх үүргээ зөрчсөн тул ажлын үр дүнгийн доголдлыг арилгахад шаардагдах зардлыг хариуцагчаас гаргуулах нь хуульд нийцсэн.