Тогтоол №20588

ХЭРГИЙН ТАНИЛЦУУЛГА: Нэхэмжлэгч нь хариуцагчаас тоног төхөөрөмжийн элэгдэл, хорогдолд орсноос үүссэн үнийн бууралтыг нэхэмжилсэн. Хариуцагч нь уг нэхэмжлэлийг эс зөвшөөрч, хэргийн талаар өмнөх шүүх хуралдаанаас шийдвэр гарч, гүйцэтгэх ажиллагаа явагдаж байгааг дурдсан. АНХАН ШАТ: Иргэний хуулийн 493 дугаар зүйлийн 493.2, 493.7 дахь хэсэгт заасан үндэслэл тогтоогдохгүй тул нэхэмжлэлийг бүхэлд нь хэрэгсэхгүй болгосон. ДАВЖ ЗААЛДАХ ШАТ: Нэхэмжлэгч нь анхан шатны шүүх хэргийн бодит байдлыг буруу тайлбарласан, тоног төхөөрөмжийн үнэ бууралтад хариуцагчийн буруутай үйлдэл, шалтгаант холбоо тогтоогдоогүй гэсэн дүгнэлт үндэслэлгүй гэж гомдол гаргасан. Хариуцагч нь нэхэмжлэгч тухайн тоног төхөөрөмжийг ашигласан гэх мэт тайлбар хийж, нэхэмжлэлийг эс зөвшөөрөв.

ҮНДЭСЛЭЛ: Талууд хамтран ажиллахаар тохиролцоод, нэхэмжлэгч тоног төхөөрөмж, хариуцагч автомашинаар хөрөнгө оруулсан боловч хамтын ажиллагаа зорилгоо биелүүлэх боломжгүй болсон үндэслэлээр дуусгавар болсон. Тоног төхөөрөмжийн үнэлгээ элэгдлийг тооцон буурсан нь хүчин төгөлдөр шүүхийн шийдвэрээр тогтоогдсон. Талууд гэрээ дуусгавар болоход ашиг алдагдал, элэгдэл хорогдлыг хуваарилах талаар тохиролцоогүй, мөн тоног төхөөрөмж хариуцагчийн буруутай үйлдэл, эс үйлдэхүйн улмаас элэгдэж хорогдсон нь тогтоогдоогүй тул учирсан хохирол гаргуулах үндэслэлгүй. Өмнөх шүүхийн шийдвэр хүчин төгөлдөр хэвээр байгааг үндэслэн давж заалдах гомдлыг хангахгүй орхисон.