Тогтоол №17134

ХЭРГИЙН ТАНИЛЦУУЛГА: Нэхэмжлэгч нь хариуцагчтай байгуулсан газрын тосны бүтээгдэхүүн худалдах, худалдан авах гэрээний үүргээ биелүүлээгүйгээс үүссэн үлдэгдэл төлбөр болон алданги гаргуулах, барьцаа хөрөнгөөр үүргийг хангуулах шаардлага гаргажээ. Хариуцагч нь нийлүүлсэн түлшний чанар муу байсан, гарал үүсэл, үнийн талаар төөрөгдсөн, залилангийн шинжтэй гэрээ байгуулсан тул нэхэмжлэлийг хүлээн авахгүй гэж маргажээ. Хамтран хариуцагч нь гэрээний маргаанд хувьцаа эзэмшигчийг хамтран хариуцагчаар татсан нь үндэслэлгүй гэж тайлбарлажээ. АНХАН ШАТ: Хариуцагч "Д- Т-" ХК-аас 1.355.969.700 төгрөг гаргуулж, алданги 677.984.850 төгрөг гаргуулах, харин хамтран хариуцагч С.Н-т холбогдох шаардлага, барьцаа хөрөнгөөр үүргийг хангуулах шаардлагыг хэрэгсэхгүй болгож шийдвэрлэжээ. ДАВЖ ЗААЛДАХ ШАТ: Нэхэмжлэгч нь алданги ногдуулах болон барьцаа хөрөнгөөр үүргийн гүйцэтгэлийг хангуулах талаарх анхны шатны шүүхийн шийдвэрийг үндэслэлгүй гэж гомдол гаргажээ. Хариуцагчийн өмгөөлөгч нь алданги ногдуулах заалт нь Иргэний хуулийн зүйл заалттай нийцдэггүй, барьцааны гэрээ улсын бүртгэлд бүртгэгдээгүй тул хүчин төгөлдөр бус гэж үзсэн нь зөв гэж хариу тайлбар гаргажээ. ҮНДЭСЛЭЛ: Анхан шатны шүүх нь хэргийн оролцогчийн нотлох баримт бүрдүүлэх эрхийг хангаж, гэрээг бүртгүүлсэн эсэх талаарх маргаантай асуудлыг бүрэн шалгаж, тодруулаагүй нь хэргийг шийдвэрлэхэд учир дутагдалтай болжээ. Иймд хэргийг дахин хэлэлцүүлэхээр анхан шатны шүүхэд буцаажээ.