Тогтоол №14052

ХЭРГИЙН ТАНИЛЦУУЛГА: Нэхэмжлэгч нь хариуцагчтай байгуулсан газрын тосны бүтээгдэхүүн зээлээр худалдах, худалдан авах гэрээний үүргийн дагуу төлөгдөөгүй үлдэгдэл төлбөр, алданги, хүү гаргуулах шаардлага гаргасан. Хариуцагч нь гэрээнд зааснаас илүү дүнгээр нийлүүлсэн барааны төлбөр, түүнээс үүдэлтэй алданги, хүү төлөх үндэслэлгүй, талууд тооцоо нийлсэн актаар гэрээний үүргээ дуусгавар болгосон гэж маргажээ. АНХАН ШАТ: Ү ХХК-аас 140 113 566 төгрөгийг гаргуулж МТ ХХК-д олгож, нэхэмжлэлийн шаардлагаас үлдэх хэсгийг хэрэгсэхгүй болгосон. ДАВЖ ЗААЛДАХ ШАТ: Хариуцагчийн итгэмжлэгдсэн төлөөлөгч нь анхан шатны шүүхийн шийдвэр нь хүү, алданги тогтоосон хэсэгтээ үндэслэлгүй, тооцоо нийлсэн актаар гэрээний үүрэг дуусгавар болсон гэж гомдол гаргасан. ҮНДЭСЛЭЛ: Талууд байгуулсан гэрээгээр зээлээр худалдан авсан барааны төлбөрийг худалдан авснаас хойш 30 хоногийн дотор төлөх, хугацаа хэтэрвэл үүргийн үнийн дүнгийн 0.5 хувиар алданги төлөхөөр тохиролцсон нь Иргэний хуульд нийцсэн. Гэрээний үндсэн үүрэг 50 000 000 төгрөгийн хэмжээнд хүү, алданги шаардах эрхтэй. Хариуцагч нь гэрээний үүргээ бүрэн биелүүлээгүй, тооцоо нийлсэн актаар гэрээний үүргээ дуусгавар болгосон гэж үзэх үндэслэлгүй. Анхан шатны шүүхийн шийдвэр хууль ёсны бөгөөд үндэслэлтэй байсан тул хэвээр үлдээжээ.