ХЭРГИЙН ТАНИЛЦУУЛГА: "О" ХХК нь "Т" ХХК-ийн ашигт малтмал худалдах, худалдан авах гэрээний үүргээ биелүүлээгүйгээс болж урьдчилгаанд төлсөн 40,141,800 төгрөгийг буцаан шаардсан. "Т" ХХК нь гэрээний үүргээ биелүүлээгүй, орлого орсон нь баримтаар нотлогдоогүй, гэрээ тамгагүй, улсын бүртгэлд бүртгэгдээгүй тул нэхэмжлэлийг хэрэгсэхгүй болгохыг хүссэн.
АНХАН ШАТ: Иргэний хуулийн 56.5-д заасныг үндэслэн "Т" ХХК-ийг 40,141,800 төгрөгийг "О" ХХК-д төлж, улсын тэмдэгтийн хураамжийг хариуцагчаас гаргуулж, нэхэмжлэгчид олгож шийдвэрлэсэн.
ДАВЖ ЗААЛДАХ ШАТ: Хариуцагч нь харьяалал зөрчсөн, бодит байдалд нийцсэн дүгнэлт хийгээгүй, мөнгө хүлээн авсан баримт дахь гарын үсэг нь талийгчийн биш болохыг нэхэмжлэгч хүлээн зөвшөөрсөн байхад төлбөр хариуцуулсан, гэрчийн мэдүүлэгт тулгуурлан шийдвэрлэсэн нь үндэслэлгүй, компанийг төлөөлөх эрхийн баримт хангалтгүй хэмээн гомдол гаргасан.
АНХАН ШАТНЫ ШИЙДВЭРИЙГ ХЭВЭЭР ҮЛДЭЭЖ, ХАРИУЦАГЧИЙН ГОМДЛЫГ ХАНГАХГҮЙ ОРХИСОН.
ҮНДЭСЛЭЛ: Шүүх талуудын хооронд худалдах, худалдан авах гэрээний харилцаа үүссэн гэж зөв дүгнэлт хийсэн. Гэрээ хүчин төгөлдөр байсан. Нэхэмжлэгч 20 000 ам.доллар төлсөн нь гэрчийн мэдүүлгээр тогтоогдсон бөгөөд хариуцагч гэрчийн мэдүүлгийг Иргэний хэрэг шүүхэд хянан шийдвэрлэх тухай хуулийн дагуу няцаагаагүй. Иймд анхан шатны шүүхийн шийдвэр хууль ёсны бөгөөд үндэслэл бүхий байна.