Тогтоол №9451

ХЭРГИЙН ТАНИЛЦУУЛГА: Хохирогчтой маргалдаж, улмаар түлхэн унагааж, өшиглөсөн улмаас хохирогчийн эрүүл мэндэд хүнд хохирол учруулж нас бартаалсан хэрэгт шүүгдэгч Ө.Н-ийг холбогдуулан эрүүгийн хэрэг үүсгэжээ. АНХАН ШАТ: Шүүгдэгч Ө.Н-ийг хүнийг алсан гэмт хэрэгт буруутгаж, Эрүүгийн хуулийн тусгай ангийн 10.1 дүгээр зүйлийн 1 дэх хэсэгт зааснаар 8 жилийн хорих ялаар шийтгэжээ. ДАВЖ ЗААЛДАХ ШАТ: Шүүгдэгч Ө.Н болон түүний өмгөөлөгч нь анхан шатны шүүхийн шийдвэртэй холбоотой гомдол гаргасан. Өмгөөлөгчийн зүгээс анхан шатны шүүх хуралдаанд түргэний эмч болон задлан шинжилгээ хийсэн шинжээчийг оролцуулаагүй, хангалттай нотлох баримтгүйгээр шийдвэр гаргасан гэж үзсэн. ҮНДЭСЛЭЛ: Давж заалдах шатны шүүхээс анхан шатны шүүхийн шийтгэх тогтоолыг Эрүүгийн хэрэг хянан шийдвэрлэх тухай хуулийн шаардлагыг хангаагүй, тодорхойлох хэсэгт нотлох баримт, шүүгдэгчийн өмгөөлөгчийн болон иргэдийн төлөөлөгчийн санал үндэслэлүүдийг няцаан үгүйсгээгүй, ялын доод хэмжээг тогтоосон шалтгаан, хөнгөрүүлэх, хүндрүүлэх нөхцөл байдлыг харгалзан үзсэн талаараа тодорхойлоогүй, мөн шинжээчийн дүгнэлтэд дурдагдсан гэмтлийг (9 дүгээр хавирганы хугарал) орхигдуулсан зэрэг ноцтой зөрчлүүд байсны улмаас шийтгэх тогтоолыг хүчингүй болгож, хэргийг анхан шатны шүүхэд дахин хэлэлцүүлэхээр буцаажээ.