Тогтоол №5798

ХЭРГИЙН ТАНИЛЦУУЛГА: Нэг шүүгдэгч нь бусдыг хутгалж, эрүүл мэндэд нь хүнд хохирол учруулсан, нөгөө шүүгдэгч нь бусдад хөнгөн хохирол учруулсан хэрэгт холбогджээ. АНХАН ШАТ: Хутгалсан шүүгдэгчийг Эрүүгийн хуулийн тусгай ангийн 11.1 дүгээр зүйлийн 2 дахь хэсгийн 2.4-т зааснаар 3 жил 5 сар хорих ялаар, хөнгөн хохирол учруулсан шүүгдэгчийг тусгай ангийн 11.6 дугаар зүйлийн 1 дэх хэсэгт зааснаар 1 сая төгрөгөөр торгох ялаар тус тус шийтгэжээ. ДАВЖ ЗААЛДАХ ШАТ: Хутгалсан шүүгдэгч өмгөөлөгчийн хамт анхан шатны шүүхийн шийдвэрийг эс зөвшөөрч, үйлдлийг биеэ хамгаалсан, санамсар болгоомжгүй хийсэн хэмээн үзэж зүйлчлэлийг өөрчлөхийг хүсчээ. Нөгөө шүүгдэгч торгуулийг бууруулахыг хүсэв. Прокурор анхан шатны шүүхийн шийдвэрийг хэвээр үлдээхийг дэмжив. ҮНДЭСЛЭЛ: Шүүх хуралдаанд цуглуулсан нотлох баримтуудаар, хэрэг үүсгэх шалтгаан, нөхцөл байдал хангалттай тогтоогдсон. Шүүгдэгч Ц.Д нь харилцан зодолдоод дууссан байхад “ална аа” гэж хэлээд гал тогооны өрөөнд орон, хутга авч, маргаанд хамааралгүй хохирогчийг хутгалсан үйлдлийг болгоомжгүй үйлдэл, мөн боолтонд орсны улмаас аргагүй хамгаалалт хийсэн гэж үзэх үндэслэлгүй хэмээн үзжээ. Анхан шатны шүүх хэргийн нөхцөл байдалд хууль зүйн үндэслэл бүхий дүгнэлт хийж, хохирлоо нөхөн төлсөн байдлыг харгалзан оногдуулсан ял нь хуульд нийцсэн тул давж заалдах гомдлыг хэрэгсэхгүй болгож, анхан шатны шүүхийн шийтгэх тогтоолыг хэвээр үлдээжээ.