Тогтоол №3219

ХЭРГИЙН ТАНИЛЦУУЛГА: Согтууруулах ундаа хэрэглэсэн үедээ хувийн таарамжгүй харьцааны улмаас маргалдаж хохирогчийн биед тархи доргилт, зөөлөн эдийн гэмтэл, шүдний хугарал, цусан хуралт зэрэг хөнгөн гэмтэл санаатай учруулсан хэрэгт холбогдсон. Уг үйлдлийг Эрүүгийн хуулийн тусгай ангийн 99.1-д зааснаар зүйлчилсэн.

АНХАН ШАТ: Хохирогч, гэрч нарын мэдүүлэг зөрүүтэй байгаа нь "гэмт хэрэг гарсан байдал, хэн үйлдсэн" эсэхэд эргэлзээ үүсгэж буй тул Эрүүгийн байцаан шийтгэх хуулийн 80.1.1, 80.1.2-т үндэслэн хэргийг нэмэлт хэрэг бүртгэлтэд буцаасан. Шүүх мэдүүлгийн зөрүүг шалгах, худал мэдүүлэг өгсөн эсэхийг тогтоох шаардлагатай гэж үзсэн боловч хохирогчид гэмтэл учирсан нь шинжээчийн дүгнэлт болон цагдаагийн мэдүүлгээр тогтоогдсон хэмээн өмгөөлөгчийн цагаатгах саналыг хүлээж авахаас татгалзжээ.

ДАВЖ ЗААЛДАХ ШАТ: Прокурор анхан шатны шүүхийн захирамжийг хууль ёсны болон үндэслэлтэй бус гэж эсэргүүцлээ. Анхан шатны шүүх хохирогчид гэмтэл учирсан нь тогтоогдсон байхад гэрчүүдийн мэдүүлэг зөрүүтэй гэж хэргийг нэмэлт ажиллагаанд буцаасан нь ойлгомжгүй, зөрүүтэй дүгнэлт хийсэн гэж үзсэн. Мөн Эрүүгийн хуулийн 72.1.1-д заасан хөнгөн гэмт хэрэгт хүлээлгэх эрүүгийн хариуцлагын 6 сарын хөөн хэлэлцэх хугацаа дууссан байхад Эрүүгийн байцаан шийтгэх хуулийн 24.1.2-т заасныг зөрчиж, хэргийг нэмэлт ажиллагаанд буцаасан нь үндэслэлгүй гэж эсэргүүцжээ.

ҮНДЭСЛЭЛ: Анхан шатны шүүхийн захирамж нь Эрүүгийн байцаан шийтгэх хуулийн 284.1-д заасан хууль ёсны болон үндэслэлтэй байх шаардлагыг хангаагүй байна. Холбогдогчид холбогдох хөнгөн гэмт хэргийн эрүүгийн хариуцлагад татах 6 сарын хөөн хэлэлцэх хугацаа (Эрүүгийн хуулийн 72.1.1) дууссан байхад, Эрүүгийн байцаан шийтгэх хуулийн 24.1.2-т зааснаар мөрдөн байцаалтын ажиллагаа явуулах боломжгүй нөхцөл байдал үүссэн тул хэргийг нэмэлт хэрэг бүртгэлтэд буцаасан нь үндэслэлгүй бөгөөд хуулийг ноцтой зөрчсөн. Иймд прокурорын эсэргүүцлийг хүлээн авч, анхан шатны шүүхийн захирамжийг хүчингүй болгон, хэргийг анхан шатны шүүх хуралдааны ажиллагаанаас эхлэн дахин хэлэлцүүлэхээр буцаасан.