Тогтоол №2631

ХЭРГИЙН ТАНИЛЦУУЛГА: Согтууруулах ундааны зүйл хэрэглэсэн үедээ бусдын биед хөнгөн гэмтэл учруулсан хэргээр яллагдагчаар татагдсан этгээд. АНХАН ШАТ: Хэрэг бүртгэлтийн шатанд Эрүүгийн байцаан шийтгэх хуулийн 80 дугаар зүйлд заасан нотолбол зохих асуудлууд, тухайлбал гэмт хэргийн улмаас учирсан хохирлыг тогтоох, гэм буруутай хүнд хүлээлгэх хариуцлагын хэр хэмжээ, шинж чанарт нөлөөлж болзошгүй нөхцөл байдлуудыг тал бүрээс нь бүрэн шалгах, үйлдэл холбогдлыг нарийвчлан шалгаж тогтоох талаар хэрэг бүртгэлтийн ажиллагааг гүйцэд биш хийсэн гэж үзэн, хэрэгт нэмэлт ажиллагаа хийлгэхээр прокурорт буцаасан. ДАВЖ ЗААЛДАХ ШАТ: Прокурор анхан шатны шүүхийн захирамжийг эс зөвшөөрч, шинжээчийн дүгнэлтүүд нь бодит байдалтай нийцээгүй, эргэлзээтэй гэсэн үндэслэлээр эсэргүүцэл бичсэн. Өмгөөлөгч шинжээчийн дүгнэлтүүд эргэлзээтэй байгаа тул анхан шатны шүүхийн захирамжийг хэвээр үлдээхийг хүссэн. Давж заалдах шатны шүүхээс анхан шатны шүүхийн захирамж хууль ёсны ба үндэслэл бүхий болж чадаагүй, шинжээчийн дүгнэлтүүдийг хэрхэн, ямар баримтанд үндэслэн гаргасан эсэхийг тогтоох, гэмтэл учирсан эсэх талаарх асуудлуудыг тодруулах боломжтой гэж үзэн, анхан шатны шүүхийн захирамжийг хүчингүй болгож, хэргийг анхан шатны шүүхээр дахин хэлэлцүүлэхээр шийдвэрлэсэн.

ҮНДЭСЛЭЛ: Анхан шатны шүүхээс хэргийг прокурорт буцаасан нь хууль ёсны ба үндэслэл бүхий болж чадаагүй. Шинжээчийн дүгнэлтүүдийг хэрхэн, ямар баримтанд үндэслэн гаргасан эсэхийг тогтоох, гэмтлийн талаарх асуудлуудыг шинжээчээс тодруулах боломжтой байхад хэргийг буцаасан нь үндэслэлгүй. Хэрэг бүртгэлтийн шатанд шалгавал зохих зүйлийг бүгдийг шалгасан тул хэргийг анхан шатны шүүхээр хэлэлцүүлэх нь зүйтэй.