Тогтоол №3042

ХЭРГИЙН ТАНИЛЦУУЛГА: И.Гантөр нь согтууруулах ундаа хэрэглэсэн үедээ таних Д.Болдбаатартай маргалдан зодолдож, санаатай алсан гэмт хэрэгт холбогджээ. Прокурорын байгууллага И.Гантөрийн үйлдлийг Эрүүгийн хуулийн тусгай ангийн 91 дүгээр зүйлийн 91.1-д зааснаар зүйлчилсэн.

АНХАН ШАТ: И.Гантөрийг хүндрүүлэх нөхцөл байдалгүйгээр хүнийг санаатай алсан гэмт хэрэг үйлдсэн гэм буруутайд тооцож, Эрүүгийн хуулийн тусгай ангийн 91.1-д зааснаар 10 жил 1 сарын хорих ялыг чанга дэглэмтэй хорих ангид эдлүүлэхээр шийдвэрлэсэн. Цагдан хоригдсон хугацааг ялд оруулан тооцсон.

ДАВЖ ЗААЛДАХ ШАТ: Ялтан И.Гантөр болон түүний өмгөөлөгчид нь биеийн байдал, гэнэтийн цочролын улмаас үйлдэгдсэн хэрэг хэмээн Эрүүгийн хуулийн 93.1-д зааснаар зүйлчлэлийг хөнгөрүүлэх, ял эдлэх дэглэмийг өөрчлөх хүсэлт гаргасан. Хохирогчийн өмгөөлөгч нь хэргийг дутуу шалгасан, ял хөнгөдсөн, гэмт хэрэг үйлдэх үед мансууруулах бодис хэрэглэсэн байсан нь хүндрүүлэх нөхцөл байдалд тооцогдоогүй хэмээн тогтоолыг хүчингүй болгож, нэмэлт мөрдөн байцаалтад буцаах гомдол гаргасан.

ҮНДЭСЛЭЛ: Давж заалдах шатны шүүх анхан шатны шүүхийн тогтоолыг хянаад, И.Гантөр нь талийгаачийг нэг удаа цохиулсны дараа босож ирэн толгойн тус газарт олон удаа цохиж, өшиглөж алсан нь камерын бичлэг, гэрчүүдийн мэдүүлгээр тогтоогдсон тул гэнэтийн цочролд орж, өөрийгөө удирдан жолоодох чадваргүй болсон гэх нөхцөл байдал тогтоогдохгүй байна гэж үзсэн. Иймд хэргийн зүйлчлэлийг Эрүүгийн хуулийн 93.1-д зааснаар хөнгөрүүлэх үндэслэлгүй. Мөн И.Гантөрийн шинжилгээгээр илэрсэн диазепам бодис нь эмчийн бичсэн эмийн найрлагад байдаг тайвшруулах үйлчилгээтэй бодис болох нь тогтоогдсон тул мансууруулах бодисыг хууль бусаар олж авсан, хадгалсан гэж үзэх боломжгүй, ял хүндрүүлэх нөхцөл байдалд тооцохгүй. Анх удаа онц хүнд гэмт хэрэг үйлдсэн тул ялыг чанга дэглэмтэй хорих ангид эдлүүлэхээр шийдвэрлэсэн нь үндэслэлтэй. Иймд давж заалдах гомдлуудыг хэрэгсэхгүй болгож, анхан шатны шүүхийн тогтоол дахь цагдан хоригдсон хугацааны тооцооллыг 188 хоног болгон залруулав.