Тогтоол №16593

ХЭРГИЙН ТАНИЛЦУУЛГА: Залилах гэмт хэрэг үйлдсэн хэмээх хэрэгт шүүгдэгч С.Э-ийн үйлдлийг Эрүүгийн хуулийн тусгай ангийн 17.3 дугаар зүйлийн 3 дахь хэсгийн 3.1 дэх заалтад зааснаар зүйлчлэн яллах дүгнэлт үйлдсэн. АНХАН ШАТ: С.Э-ийг залилах гэмт хэргийг их хэмжээний хохирол учруулан байнга үйлдэж, амьдралын эх үүсвэр болгосон гэм буруутайд тооцож, 7 жилийн хугацаагаар хорих ял оногдуулж, 159.150.430 төгрөгийг гаргуулах, цагдан хорих таслан сэргийлэх арга хэмжээг хэвээр үлдээсэн. ДАВЖ ЗААЛДАХ ШАТ: Шүүгдэгч болон түүний өмгөөлөгч нар анхан шатны шүүхийн шийдвэртэй холбогдуулан гомдол гаргасан. Учир нь хүндэтгэн үзэх шалтгаангүйгээр шүүх хуралдаанд оролцоогүй гэж дүгнэн, өмгөөлөгчгүйгээр шүүх хуралдааныг явуулсан нь Эрүүгийн хэрэг хянан шийдвэрлэх тухай хуулийг зөрчсөн, мөрдөн шалгах ажиллагааг хуульд заасан журмын дагуу хийгээгүй, хохирлыг хөөсрүүлэн тогтоосон, мөн хэргийн бодит байдлыг бүрэн тогтоож чадаагүй зэрэг үндэслэлүүдийг дурдсан.

ҮНДЭСЛЭЛ: Давж заалдах шатны шүүхээс хэргийг бүхэлд нь хянан үзээд, анхан шатны шүүх нь шүүгдэгчийн өмгөөлөгчийг хүндэтгэн үзэх шалтгаангүйгээр ирээгүй гэж дүгнэн, өмгөөлөгчгүйгээр шүүх хуралдааныг явуулсан нь Эрүүгийн хэрэг хянан шийдвэрлэх тухай хуулийн 1.7 дугаар зүйлийн 3 дахь хэсэгт заасан "Шүүх хэргийн бодит байдлыг талуудын мэтгэлцээний үндсэн дээр тогтооно" гэснийг зөрчсөн байна. Мөн прокурор нь шүүгдэгчээс яллагдагчаар татах тогтоолд өөрчлөлт оруулсан боловч нэмэлт мэдүүлэг аваагүй нь Эрүүгийн хэрэг хянан шийдвэрлэх тухай хуулийн 32.9 дүгээр зүйлийн 2 дахь хэсгийг зөрчсөн, хэд хэдэн хэргийг нэгтгээгүй орхигдуулсан, хохирлын тооцоог буруу хийсэн зэрэг ноцтой зөрчлүүд тогтоогдсон тул анхан шатны шүүхийн шийтгэх тогтоолыг хүчингүй болгож, хэргийг прокурорт буцааж, мөрдөн шалгах ажиллагааг нөхөн гүйцэтгүүлэх нь зүйтэй гэж дүгнэн шийдвэрлэв.