Тогтоол №11841

ХЭРГИЙН ТАНИЛЦУУЛГА: Нөхөр Б.Ш нь эхнэр Б.Р-г удаа дараа зодож, эрүүл мэндэд нь хөнгөн хохирол учруулсан, харгис хэрцгий харьцсан, догшин авирласан үндэслэлээр эрүүгийн хариуцлагад татжээ. АНХАН ШАТ: Б.Ш-г хүний эрүүл мэндэд хөнгөн хохирол санаатай учруулсан, гэр бүлийн хамаарал бүхий харилцаатай хүнийг байнга зодсон, харгис хэрцгий харьцсан, догшин авирласан гэмт хэрэг үйлдсэн гэм буруутайд тус тус тооцож, нийт 1 жил 2 хоногийн хорих ял оногдуулж, нээлттэй хорих байгууллагад эдлүүлэхээр шийтгэсэн. ДАВЖ ЗААЛДАХ ШАТ: Шүүгдэгч болон түүний өмгөөлөгч нь гэм бурууг нотлох баримт хангалтгүй, хуулийг буруу хэрэглэсэн гэж гомдол гаргасан. Прокурор нь анхан шатны шүүхийн шийтгэх тогтоолыг үндэслэлгүй гэж үзэн эсэргүүцэл гаргажээ. ҮНДЭСЛЭЛ: Давж заалдах шатны шүүхээс анхан шатны шүүх Эрүүгийн хуулийн зүйл, хэсэг, заалтыг буруу тайлбарлаж хэрэглэсэн, мөн гэм буруутай эсэх асуудлыг эцэслэн шийдвэрлээгүй гэж дүгнэн, анхан шатны шүүхийн шийтгэх тогтоолыг хүчингүй болгож, хэргийг нэмэлт ажиллагаа хийлгэхээр прокурорт буцаахаар шийдвэрлэсэн.