28 дугаар зүйл.Тусгай зөвшөөрөл олгох

28.1.Энэ хуулийн 27.1-д заасан өргөдөл гаргагч нь дараах нөхцөл, шаардлагыг хангасан тохиолдолд Хороо түүнд тусгай зөвшөөрлийг хугацаагүйгээр олгоно: /Энэ хэсэгт 2023 оны 01 дүгээр сарын 06-ны өдрийн хуулиар өөрчлөлт оруулсан./

28.1.1.хуулийн этгээд тухайн зохицуулалттай үйл ажиллагааг эрхлэхэд түүний бусад үйл ажиллагаатай харшлахгүй, сонирхлын зөрчил үүсгэхгүй гэж үзсэн;

28.1.2.эрх бүхий албан тушаалтан нь тохиромжтой этгээд болох нь тогтоогдсон;

28.1.3.хүний нөөцийн хувьд Хорооноос тогтоосон шаардлага хангасан;

28.1.4.Хорооноос тогтоосон хувь нийлүүлсэн хөрөнгийн доод хэмжээг хангасан; /Энэ заалтад 2024 оны 05 дугаар сарын 16-ны өдрийн хуулиар өөрчлөлт оруулсан./

28.1.5.ажлын байр, техник, тоног төхөөрөмж, программ хангамж нь тухайн үйл ажиллагааг эрхлэх шаардлагыг хангасан;

28.1.6.хуульд заасны дагуу Хорооноос тогтоосон бусад нэмэлт нөхцөл, шаардлагыг хангасан.

28.2.Тусгай зөвшөөрөл авахыг хүссэн хуулийн этгээд тухайн үйл ажиллагааг эрхлэх нөхцөл, шаардлагыг хангаагүй гэж үзвэл Хороо түүнд тусгай зөвшөөрөл олгохоос татгалзана.

28.3.Энэ хуулийн 27.4-т заасны дагуу брокерийн үйл ажиллагаа эрхлэх тусгай зөвшөөрөлтэй этгээд нь харилцагчийг эрсдэлээс хамгаалах, харилцагч, хөрөнгө оруулагчдад мэдээлэл хүргэх журам, зах зээлийг урвуулан ашиглахаас сэргийлэх дотоод журмыг үйл ажиллагаа эрхлэхээс өмнө баталсан байна. /Энэ хэсгийг 2026 оны 07 дугаар сарын 03-ны өдрийн хуулиар нэмсэн./

28.4.Энэ хуулийн 27.5-д заасны дагуу дилерийн үйл ажиллагаа эрхлэх тусгай зөвшөөрөлтэй этгээд нь зах зээлийг урвуулан ашиглахаас сэргийлэх дотоод журмыг үйл ажиллагаа эрхлэхээс өмнө баталсан байна. /Энэ хэсгийг 2026 оны 07 дугаар сарын 03-ны өдрийн хуулиар нэмсэн./

28.5.Энэ хуулийн 27.6-д заасны дагуу үнэт цаасны өмчлөх эрхийн бүртгэлийн үйл ажиллагаа эрхлэх тусгай зөвшөөрөлтэй этгээд нь үнэт цаасны өмчлөх эрхийн бүртгэл, шилжүүлэг хийхэд хяналт тавих журмыг үйл ажиллагаа эрхлэхээс өмнө баталсан байна. /Энэ хэсгийг 2026 оны 07 дугаар сарын 03-ны өдрийн хуулиар нэмсэн./

28.6.Үнэт цаас итгэмжлэн удирдах үйл ажиллагаа эрхлэх тусгай зөвшөөрөлтэй этгээд нь үйл ажиллагаанд үүсэж болзошгүй эрсдэлийг тооцох, хэмжих, үнэлэх, удирдах журам болон зах зээлийг урвуулан ашиглахаас сэргийлэх дотоод журмыг үйл ажиллагаа эрхлэхээс өмнө баталсан байна. /Энэ хэсгийг 2026 оны 07 дугаар сарын 03-ны өдрийн хуулиар нэмсэн./

28.7.Энэ хуулийн 27.7-д заасны дагуу үнэт цаасны клирингийн үйл ажиллагаа эрхлэх тусгай зөвшөөрөлтэй этгээд нь хөрөнгө оруулагчийг клирингийн үйл ажиллагаатай холбоотой болзошгүй эрсдэлээс хамгаалах сан байгуулах, сангийн хөрөнгийг захиран зарцуулах нөхцөлийг тусгасан дотоод журам болон үнэт цаасны арилжааны болон арилжааны бус хэлцлийн дүнд үүссэн тооцоог тодорхойлох, төлбөрийг хийж гүйцэтгэх журмыг үйл ажиллагаа эрхлэхээс өмнө баталсан байна. /Энэ хэсгийг 2026 оны 07 дугаар сарын 03-ны өдрийн хуулиар нэмсэн./

28.8.Энэ хуулийн 27.8-д заасны дагуу үнэт цаасны төлбөр тооцооны үйл ажиллагаа эрхлэх тусгай зөвшөөрөлтэй этгээд нь үнэт цаасны арилжааны болон арилжааны бус хэлцлийн төлбөрийг хийж гүйцэтгэх журам, үнэт цаасны төлбөр тооцооны эрсдэлийн удирдлагын журам, хөрөнгө оруулагчийг үнэт цаасны төлбөр тооцооны үйл ажиллагаатай холбоотой болзошгүй эрсдэлээс хамгаалах сан байгуулах, сангийн хөрөнгийг захиран зарцуулах нөхцөлийг тусгасан дотоод журмыг үйл ажиллагаа эрхлэхээс өмнө баталсан байна. /Энэ хэсгийг 2026 оны 07 дугаар сарын 03-ны өдрийн хуулиар нэмсэн./

28.9.Энэ хуулийн 27.9-д заасны дагуу үнэт цаасны төвлөрсөн хадгаламжийн үйл ажиллагаа эрхлэх тусгай зөвшөөрөлтэй этгээд нь гишүүн кастодиантай мэдээлэл тасралтгүй солилцох, зах зээлийн хэвийн үйл ажиллагааг хангах тухай үйл ажиллагааны журмыг үйл ажиллагаа эрхлэхээс өмнө баталсан байна. /Энэ хэсгийг 2026 оны 07 дугаар сарын 03-ны өдрийн хуулиар нэмсэн./

28.10.Энэ хуулийн 27.10-д заасны дагуу кастодианы үйл ажиллагаа эрхлэх тусгай зөвшөөрөлтэй этгээд нь харилцагчийн мэдээлэл, баримт бичгийг ашиглах, хадгалах, хамгаалах журам болон кастодианы үйлчилгээтэй холбоотой мэдээллийг харилцагчид хүргэх журмыг үйл ажиллагаа эрхлэхээс өмнө баталсан байна. /Энэ хэсгийг 2026 оны 07 дугаар сарын 03-ны өдрийн хуулиар нэмсэн./

28.11.Энэ хуулийн 27.11-д заасны дагуу үнэт цаасны арилжаа эрхлэх үйл ажиллагааны тусгай зөвшөөрөлтэй этгээд нь үнэт цаасны бүртгэлийн журам болон зах зээлийг урвуулан ашиглахаас сэргийлэх дотоод журмыг үйл ажиллагаа эрхлэхээс өмнө баталсан байна. /Энэ хэсгийг 2026 оны 07 дугаар сарын 03-ны өдрийн хуулиар нэмсэн./

28.12.Энэ хуулийн 27.12-т заасны дагуу санхүүжих чадавхын зэрэглэл тогтоох үйл ажиллагаа эрхлэх тусгай зөвшөөрөлтэй этгээд нь үнэт цаасны хороодын олон улсын байгууллагаас гаргасан зээлжих зэрэглэлийн байгууллагуудад зориулсан ёс зүйн дүрэмд нийцүүлэн боловсруулсан Зэрэглэл тогтоох үйл ажиллагааны ёс зүйн дүрэм болон тогтоосон зэрэглэлийн талаарх мэдээллийг олон нийтэд хүргэх журмыг үйл ажиллагаа эрхлэхээс өмнө баталсан байна. /Энэ хэсгийг 2026 оны 07 дугаар сарын 03-ны өдрийн хуулиар нэмсэн./

28.13.Энэ хуулийн 27.14-т заасны дагуу үнэт цаасны хөрөнгө оруулалтын зөвлөхийн үйл ажиллагаа эрхлэх тусгай зөвшөөрөлтэй этгээд нь үнэт цааснаас үүсэж болох эрсдэлийг тооцох, хэмжих, үнэлэх, удирдах дүрэм, журмыг үйл ажиллагаа эрхлэхээс өмнө баталсан байна. /Энэ хэсгийг 2026 оны 07 дугаар сарын 03-ны өдрийн хуулиар нэмсэн./

28.14.Зөвшөөрөл олгох эрх бүхий этгээд Зөвшөөрөл, мэдэгдлийн тухай хуулийн 3.3 дугаар зүйлийн 1-д заасны дагуу зөвшөөрөл олгох эрхээ бүхэлд нь, эсхүл хэсэгчлэн гэрээний үндсэн дээр Хуулийн этгээдийн улсын бүртгэлийн тухай хуулийн 7 дугаар зүйлийн 7.1.3, 7.1.7-д заасан хуулийн этгээдэдшилжүүлэн гүйцэтгүүлж болно. /Энэ хэсгийг 2026 оны 07 дугаар сарын 03-ны өдрийн хуулиар нэмсэн./