4 дүгээр зүйл.Хуулийн нэр томьёоны тодорхойлолт

4.1.Энэ хуульд хэрэглэсэн дараах нэр томьёог доор дурдсан утгаар ойлгоно:

4.1.1."аюул тулгарсан агаарын хөлөг" гэж агаарын хөлөг болон зорчигчдод аюул учирч, түүнийг нисэх баг өөрийн үйл ажиллагаагаар арилгаж чадахгүйд хүрсэн, эсхүл агаарын хөлөг холбоогүй буюу байрлал нь тодорхой бус болсон;

4.1.2."аюулд нэрвэгдсэн агаарын хөлөг" гэж агаарын хөлөг нислэг үйлдэх, хөөрөх, буух, явгалах үед агаарын хөлөг гэмтэж, агаарын хөлөг болон зорчигчдод аюул учирч, аргагүйдсэн нөхцөлд буулт хийсэн, эсхүл бүрэн эвдэрсэн хөлгийг;

4.1.3."байлдааны агаарын хөлөг" гэж байлдаанд ашиглах зориулалтаар зэвсэг, галт хэрэглэл, тусгай төхөөрөмжөөр тоноглогдсон агаарын хөлгийг;

4.1.4."байлдааны үүргийн нислэг" гэж байлдааны үүрэг гүйцэтгэх, байлдааны жижүүрлэлт болон Монгол Улсын агаарын зайн аюулгүй байдлыг хангах ажиллагааны нислэгийг;

4.1.5."захиалгат нислэг" гэж гамшиг, ослын болон бусад үед яаралтай хүний амь нас, эрүүл мэндийг аврах, тусгай үүрэг гүйцэтгэх чиглэлээр иргэн, хуулийн этгээдийн хүсэлтээр үйлдэх нислэгийг;

4.1.6."олон улсын нислэг" гэж улсын агаарын хөлгөөр Монгол Улс, гадаад улс хооронд үйлдэх нислэгийг;

4.1.7."онцгой үүргийн нислэг" гэж Төрийн тусгай хамгаалалтын тухай хуулийн 6.1.1, 6.1.2, 6.1.6, 6.1.7-д заасан этгээдэд үйлчлэх нислэгийг;

4.1.8."сургууль-байлдааны нислэг" гэж бүх төрлийн буудлага, бөмбөгдөлт, пуужингийн харвалттай нислэг болон олон улсын хээрийн сургууль- дадлагын нислэгийг;

4.1.9."сургууль-дадлагын нислэг" гэж нисэх багийн бүх төрлийн дадлага сургалт, эрх олгох нислэгийг;

4.1.10."тусгай үүргийн нислэг" гэж тайван цагийн батлан хамгаалах нислэг, хил хамгаалалт, хилийн эрэл, тусгай ажиллагаа, гэмт хэрэгтэй тэмцэх, урьдчилан сэргийлэх, гамшиг, осол, эрэн хайх, аврах ажиллагаа, эмнэлгийн яаралтай түргэн тусламж болон төрийн чиг үүргийг хэрэгжүүлэгч байгууллагын ажил, үүргийг гүйцэтгэх нислэгийг;

4.1.11."улсын агаарын хөлөг" гэж төрийн цэргийн, хууль сахиулах болон төрийн тусгай чиг үүргийг хэрэгжүүлэгч байгууллагын нисэх онгоц, нисдэг тэрэг, бусад агаарын хөлгийг;

4.1.12."улсын агаарын хөлгийг эзэмшигч байгууллага" гэж төрийн цэргийн, хууль сахиулах болон төрийн бусад чиг үүргийг хэрэгжүүлэгч байгууллагыг;

4.1.13."улсын нисэх" гэж улсын агаарын хөлгөөр үйл ажиллагаа гүйцэтгэхтэй холбогдсон цогц ойлголтыг;

4.1.14."Улсын нисэхийн багц дүрэм" гэж энэ хуулийн 11 дүгээр зүйлд заасан харилцааг зохицуулах эрх зүйн баримт бичгийг;

4.1.15."цэргийн зориулалттай нисгэгчгүй нисэх хэрэгсэл" гэж цэргийн байгууллагын үйл ажиллагаанд ашиглах нисгэгчгүй болон зайнаас удирдах агаарын хөлгийг;

4.1.16."шалгалт, туршилтын нислэг" гэж агаарын хөлгийг агаар болон газарт шалгах, засвар, техникийн үйлчилгээ, тоног төхөөрөмж суурилуулсны дараа хийх нислэгийг.

4.2.Нисэхийн үйл ажиллагаатай холбоотой энэ хуулиар зохицуулаагүй бусад нэр томьёог Иргэний нисэхийн тухай хуулийн 5 дугаар зүйлд заасан утгаар хэрэглэнэ.

ХОЁРДУГААР БҮЛЭГ

УЛСЫН НИСЭХИЙН ТАЛААРХ ТӨРИЙН БАЙГУУЛЛАГЫН БҮРЭН ЭРХ