14 дүгээр зүйл.Аймаг, нийслэлийн шинжлэх ухаан, технологи, инновацын дэд зөвлөл

14.1.Бүс, орон нутагт шинжлэх ухаан, технологийг хөгжүүлэх зорилт, үйл ажиллагааг шинжлэх ухаан, технологийн талаар төрөөс баримтлах бодлоготой уялдуулан зохицуулах, хэрэгжүүлэх чиг үүрэг бүхий аймаг, нийслэлийн Шинжлэх ухаан, технологи, инновацын дэд зөвлөл /цаашид "Дэд зөвлөл" гэх/-ийг аймаг, нийслэлийн Засаг даргын шийдвэрээр байгуулан ажиллуулна.

14.2.Дэд зөвлөл дараах бүрэн эрхийг хэрэгжүүлнэ:

14.2.1.энэ хуулийн 7.1-д заасан бодлогын баримт бичгийн төслийг боловсруулах;

14.2.2.бүс, орон нутгийн шинжлэх ухаан, технологи, инновацыг дэмжих чиглэлээр төрийн захиргааны төв болон нутгийн захиргааны байгууллагын хэрэгжүүлж байгаа бодлого, хөтөлбөр, төслийн хэрэгжилт, зохицуулалтыг уялдуулах;

14.2.3.бүс, орон нутаг хоорондын шинжлэх ухаан, технологийн солилцоо, хамтын ажиллагааг хөгжүүлэх;

14.2.4.бүс, орон нутгийн хэмжээнд шинжлэх ухаан, үйлдвэрлэлийг уялдуулан хөгжүүлэх арга хэмжээг төлөвлөх, дэмжлэг үзүүлэх;

14.2.5.бүс, орон нутгийн судалгаа хөгжүүлэлтийн ажлын үр дүнг үйлдвэрлэл, үйлчилгээнд нэвтрүүлэхэд дэмжлэг үзүүлэх;

14.2.6.эрдэм шинжилгээний байгууллага, их сургууль, энэ хуулийн 3.1.16-д заасан байгууллагатай хамтран ажиллах;

14.2.7.хэлэлцэх асуудлын жагсаалтад дэд зөвлөлийн даргаас оруулсан бусад асуудал.

14.3.Дэд зөвлөлийн үлгэрчилсэн дүрмийг Засгийн газар батална.

14.4.Аймаг, нийслэлийн Засаг дарга дэд зөвлөлийн бүрэлдэхүүнийг баталж, дэд зөвлөлийг ахална.