4 дүгээр зүйл.Хуулийн нэр томьёоны тодорхойлолт

4.1.Энэ хуульд хэрэглэсэн дараах нэр томьёог доор дурдсан утгаар ойлгоно:

4.1.1."мэдээллийн систем" гэж мэдээлэл цуглуулах, боловсруулах, хайх, илгээх, хүлээн авах, ашиглах болон аюулгүй байдлыг хангах зорилго бүхий программ хангамж, техник хангамж, мэдээллийн сан, бусад бүрэлдэхүүн хэсэг, тэдгээрийн иж бүрдлийг;

4.1.2."мэдээллийн сүлжээ" гэж хоёр, түүнээс дээш хэрэглэгчийн хооронд мэдээлэл илгээх, дамжуулах, хүлээн авах программ хангамж болон техник хэрэгслийн иж бүрдлийг;

4.1.3."мэдээллийн эзэн" гэж Хүний хувийн мэдээлэл хамгаалах тухай хуулийн 4.1.5-д заасан хүн болон тухайн мэдээллээр тодорхойлогдож байгаа хуулийн этгээдийг;

4.1.4."мэдээлэл ашиглах" гэж мэдээллийг цуглуулах, боловсруулахаас бусад хэлбэрээр үйл ажиллагаандаа хэрэглэх, дамжуулах болон мэдээлэлтэй танилцахыг;

4.1.5."мэдээлэл боловсруулах" гэж мэдээллийг ангилах, хадгалах, дүн шинжилгээ хийх, өөрчлөх, устгах, сэргээх үйл ажиллагаа, тэдгээрийн нийлбэрийг;

4.1.6."мэдээлэл цуглуулах" гэж мэдээллийг олж авах, бүрдүүлэх, бүртгэх үйл ажиллагааг;

4.1.7."нийтийн мэдээллийн дэд бүтэц" гэж нийтийн мэдээлэл хариуцагч хуульд заасан чиг үүргийнхээ хүрээнд мэдээлэл цуглуулах, боловсруулах, ашиглах, аюулгүй байдлыг хангахад ашиглаж байгаа мэдээллийн систем, мэдээллийн сүлжээг;

4.1.8."нийтийн мэдээлэл" гэж нийтийн мэдээлэл хариуцагч хуульд заасан чиг үүргийнхээ хүрээнд цуглуулсан, боловсруулсан, ашиглаж байгаа өгөгдлийн бүрдлийг;

4.1.9."цахим баримт бичиг" гэж мэдээллийн системийг ашиглан үүсгэх, боловсруулах, хадгалах, илгээх болон хүлээн авах боломжтой мэдээллийг.

4.1.10."хиймэл оюун бүхий систем" гэж өгөгдөл, алгоритм, загвар, дүрэмд үндэслэн мэдээлэл боловсруулж, тодорхой зорилгын хүрээнд таамаглал, зөвлөмж, дүгнэлт, агуулга болон шийдвэрийн төсөл зэрэг үр дүн үүсгэх чадвартай, бие даасан ажиллагааны тодорхой түвшин бүхий мэдээллийн системийг; /Энэ заалтыг 2026 оны 07 дугаар сарын 03-ны өдрийн хуулиар нэмсэн./

4.1.11."автоматжуулсан шийдвэр" гэж мэдээллийн систем, эсхүл хиймэл оюун бүхий системээр мэдээлэл боловсруулсны үр дүнд хүний оролцоогүйгээр шийдвэр гаргах, эсхүл хариу үйлдэл гаргах ажиллагааг; /Энэ заалтыг 2026 оны 07 дугаар сарын 03-ны өдрийн хуулиар нэмсэн./

4.1.12."бүртгэлийн хамгаалалттай технологи" гэж мэдээллийг сүлжээний олон зангилаанд хуваарилан хадгалж, шифрлэлтийн аргаар баталгаажуулах бүртгэлийн бүрэн бүтэн байдал, өөрчлөлтийн түүхийг хадгалах боломжтой цахим технологийг; /Энэ заалтыг 2026 оны 07 дугаар сарын 03-ны өдрийн хуулиар нэмсэн./

4.1.13."мэдээлэл солилцох сервис" гэж мэдээллийн систем хооронд тогтоосон дүрэм, протокол, техникийн нөхцөлийн дагуу өгөгдөл солилцох, функц дуудах, цахим үйлчилгээ авах, үзүүлэх боломжийг бүрдүүлсэн цахим үйлчилгээний хэлбэрийг; /Энэ заалтыг 2026 оны 07 дугаар сарын 03-ны өдрийн хуулиар нэмсэн./

4.1.14."цахим бизнес эрхлэгч" гэж Монгол Улсад биечлэн оршин суухгүйгээр Монгол Улсын хууль тогтоомжийн дагуу цахим хэлбэрээр аж ахуйн үйл ажиллагаа эрхлэх, төрийн үйлчилгээ авах зорилгоор зохих журмын дагуу бүртгүүлсэн гадаадын иргэн, харьяалалгүй хүнийг. /Энэ заалтыг 2026 оны 07 дугаар сарын 03-ны өдрийн хуулиар нэмсэн./