Тогтоол №2672

ХЭРГИЙН ТАНИЛЦУУЛГА: "Г" ХХК болон "В" ХХК-иуд нь хот дахин төлөвлөлтийн хүрээнд инженерийн дэд бүтэц барихад газар чөлөөлөхөд их хэмжээний зардал гаргасан. Нийслэлийн Иргэдийн Төлөөлөгчдийн Хурлын Тэргүүлэгчдийн тогтоолоор дэд бүтцийг нийслэлийн өмчид бүртгэн авсныг нэхэмжлэгч хууль бус хэмээн хүчингүй болгож, газар чөлөөлөхөд гарсан хохирлыг Нийслэлийн Засаг даргаас гаргуулахыг шаардсан.

АНХАН ШАТ: Нэхэмжлэлийн зарим шаардлагыг хангаж, нийслэлийн Иргэдийн Төлөөлөгчдийн Хурлын Тэргүүлэгчдийн тогтоолын "Г" ХХК-д холбогдох хэсгийг хүчингүй болгосон. Харин хохирол гаргуулах нэхэмжлэлийг хэрэгсэхгүй болгосон. Хот, суурин газрыг дахин хөгжүүлэх тухай хууль, Захиргааны ерөнхий хуулийг баримталсан.

ДАВЖ ЗААЛДАХ ШАТ: Анхан шатны шүүхийн шийдвэрийг хүчингүй болгож, маргаантай тогтоолыг хүчингүй болгуулах нэхэмжлэлийг хэрэгсэхгүй болгосон. Мөн хохирол гаргуулах шаардлагыг хүлээн авахаас татгалзаж, хэргийг хэрэгсэхгүй болгосон. Хот, суурин газрыг дахин хөгжүүлэх тухай хууль, Төрийн болон орон нутгийн өмчийн тухай хуулийг үндэслэсэн.

ХЯНАЛТЫН ШАТ: Нэхэмжлэгч давж заалдах шатны шүүхийн магадлалыг эс зөвшөөрч гомдол гаргасан. Гомдолд, маргаантай тогтоол нь Захиргааны ерөнхий хуулийн зарчмуудыг зөрчсөн захиргааны акт болохыг шүүх үгүйсгэсэн, газар чөлөөлөх зардлыг хохирол гэж үзэхгүй гэж буруу дүгнэсэн, өмчлөлийн асуудлыг анхаараагүй гэж дурдсан. Хяналтын шатны шүүх өмнөх шатны шүүхийн шийдвэр, магадлалыг хүчингүй болгож, хэргийг дахин хэлэлцүүлэхээр анхан шатны шүүхэд буцаасан.

ҮНДЭСЛЭЛ: Шүүхүүд "сонгосон талбай" гэсэн ойлголтыг тодорхой ялгаж салгаагүй, газар чөлөөлөх зардлыг төслийн болон инженерийн дэд бүтцийн чөлөөлөх ажил болох эсэхийг хууль зүйн үндэслэлтэйгээр дүгнээгүй. Хохирлын нэхэмжлэлийн үндэслэл тодорхойгүй, захиргааны актын улмаас учирсан хохирол болон зардлыг нөхөн гаргуулах эрх зүйн ойлголтыг ялгаж дүгнээгүй нь хууль ёсны бөгөөд үндэслэл бүхий байх зарчимд нийцээгүй тул хэргийг дахин хэлэлцүүлэхээр буцаасан.