Тогтоол №2631

ХЭРГИЙН ТАНИЛЦУУЛГА: Нэхэмжлэгч нар гэр хорооллын дахин төлөвлөлтийн төслийн гурван талт гэрээний үүргээ биелүүлээгүйг тогтоож, төсөл хэрэгжүүлэгчийн эрхийг цуцлан, газар өмчлөх гэрчилгээгээ буцаан олгохыг, мөн үүргээ биелүүлээгүйгээс учирсан хохирлыг Нийслэлийн Засаг даргаас гаргуулахыг шаардсан. Нэхэмжлэгч нар газраа чөлөөлсөн боловч төсөл хэрэгжүүлэгч компани үүргээ биелүүлээгүйгээс иргэд хохирч, Нийслэлийн Засаг дарга хяналт тавих үүргээ хангалтгүй биелүүлсэн.

АНХАН ШАТ: Нэхэмжлэлийн шаардлагыг бүхэлд нь хангаж, төсөл хэрэгжүүлэгч компани гэрээний үүргээ биелүүлээгүйг тогтоосон. Иймд тус компанийн төсөл хэрэгжүүлэх эрхийг цуцалж, нэхэмжлэгч нарын газар өмчлөх эрхийн гэрчилгээг буцаан олгохыг, мөн учирсан хохирлыг хариуцагч нараас гаргуулахаар шийдвэрлэсэн. Үндэслэл нь Захиргааны ерөнхий хуулийн 52.1, 52.2.1, 56.3, 57.1.

ДАВЖ ЗААЛДАХ ШАТ: Нэхэмжлэгч нарын хохирол гаргуулах шаардлагыг хэрэгсэхгүй болгож, хариуцагч нарын гомдлыг хангасан. Үүнийг хохирлын асуудал нь иргэний эрх зүйн харилцаанд хамаарна гэж үзсэн. Бусад шаардлагыг хэвээр үлдээсэн.

ХЯНАЛТЫН ШАТ: Нэхэмжлэгч нар хохирол гаргуулах шаардлагыг хэрэгсэхгүй болгосон давж заалдах шатны шүүхийн шийдвэрийг, гуравдагч этгээд төсөл хэрэгжүүлэх эрхийг цуцалсныг тус тус эс зөвшөөрч гомдол гаргасан. Хяналтын шатны шүүх давж заалдах шатны шүүхийн магадлалыг хүчингүй болгож, анхан шатны шүүхийн шийдвэрт хууль хэрэглээний өөрчлөлт оруулан хэвээр үлдээв. Ингэхдээ нэхэмжлэгч нарын гомдлыг хангаж, гуравдагч этгээдийн гомдлыг хангахгүй орхисон.

ҮНДЭСЛЭЛ: Гурван талт гэрээ нь нийтийн эрх зүйн харилцаанаас үүссэн захиргааны гэрээ юм. Төсөл хэрэгжүүлэгч компани үүргээ биелүүлээгүй, Нийслэлийн Засаг дарга хяналт тавих болон гэрээ цуцлах үүргээ биелүүлээгүйгээс иргэдэд хохирол учирсан нь тогтоогдсон. "Түр оршин суух түрээсийн гэрээ" нь захиргааны гэрээний салшгүй хэсэг тул түүнээс үүссэн хохирлыг захиргааны байгууллага хариуцах үндэслэлтэй. Захиргааны ерөнхий хуулийн 56.2, 57.1, 100.1-д заасны дагуу гэрээг цуцлах, гэрчилгээг буцаан олгох, хохирлыг арилгах нь зүйтэй. Иймд анхан шатны шүүхийн шийдэл зөв бөгөөд давж заалдах шатны шүүхийн хохирол гаргуулах шаардлагыг хэрэгсэхгүй болгосон нь буруу байна. Төсөл хэрэгжүүлэх эрхийг цуцлах нь зөвхөн нэхэмжлэгч нартай байгуулсан гурван талт гэрээг цуцлахыг хэлнэ.