Тогтоол №2566

ХЭРГИЙН ТАНИЛЦУУЛГА: Иргэн Б.Н нь Гаалийн ерөнхий газрын харьяа Улс хоорондын шуудан илгээмжийн гаалийн газрын албан бичгийг хүчингүй болгуулахаар нэхэмжилжээ. Нэхэмжлэгч нь захиалсан бүтээгдэхүүн нь АНУ-д хүнсний бүтээгдэхүүнд хамаардаг, олон улсын барааны кодоор хүнсний ангилалд багтдаг, улсын стандартад ч хүнс гэж тодорхойлогддог болохыг, мөн "Эм, эмнэлгийн хэрэгслийн тухай хууль"-ийн заалтууд үл хамаарах тул уг бүтээгдэхүүнийг импортын зорилгоор оруулж ирсэн гэж үзэх, эмийн төрөлд хамааруулах үндэслэлгүй хэмээн маргажээ.

АНХАН ШАТ: Гаалийн газрын албан бичгийг хүчингүй болгож, нэхэмжлэлийг хангасан. Гаалийн тариф, гаалийн татварын тухай хуулийн 38 дугаар зүйлийн 38.1.15-д заасныг үндэслэжээ.

ДАВЖ ЗААЛДАХ ШАТ: Анхан шатны шүүхийн шийдвэрийг хүчингүй болгож, нэхэмжлэлийг бүхэлд нь хэрэгсэхгүй болгосон. "Elev8", "Аcceler8", "Hydr8" бүтээгдэхүүнийг "Эм, эмнэлгийн хэрэгслийн тухай" хуулиар зохицуулагдах эмийн төрлийн бүтээгдэхүүн гэж үзсэн. Гаалийн тухай хуулийн 223 дугаар зүйлийн 223.2, Эм, эмнэлгийн хэрэгслийн тухай хуулийн 3 дугаар зүйлийн 3.1.25, 6 дугаар зүйлийн 6.2.2, 15 дугаар зүйлийн 15.9.3, Хүнсний тухай хуулийн 11 дүгээр зүйлийн 11.1-ийг баримтлан шийдвэрлэжээ.

ХЯНАЛТЫН ШАТ: Давж заалдах шатны шүүх хуулийг буруу тайлбарлаж хэрэглэсэн, хэргийн бодит байдлыг буруу дүгнэсэн гэж үзэн, нэхэмжлэгчийн гомдлыг хангаж, давж заалдах шатны шүүхийн магадлалыг хүчингүй болгож, анхан шатны шүүхийн шийдвэрийг хэвээр үлдээжээ.

ҮНДЭСЛЭЛ:

• Гаалийн төв лабораторийн дүгнэлт болон олон улсын барааны кодоор тухайн бүтээгдэхүүн нь "Хүнсний төрөл бүрийн бэлдмэл"-д хамаарч байсан.
• АНУ-д хүнсний хэрэглээнд тохирно гэсэн гэрчилгээтэй байсан.
• "Эм, эмнэлгийн хэрэгслийн тухай хууль"-ийн 1.16-д заасны дагуу үйлдвэрлэгч улсдаа хүнсний ангилалд орсон бүтээгдэхүүн нь "Эм"-д хамаарахгүй бөгөөд улсын эмийн бүртгэлд бүртгэх шаардлагагүй.
• Тухайн бүтээгдэхүүн нь Гаалийн тухай хуулийн 223.1-д заасан хориглосон бараа, эд зүйлд хамаарахгүй, мөн 223.2-т заасан тарифын бус хязгаарлалттай бараанд хамаарахгүй.
• Иймд, хуулийн зүйл заалтыг буруу тайлбарлаж хэрэглэсэн, хэргийн үйл баримтад хамааралгүй хуулийг хэрэглэсэн нь үндэслэлгүй болсон.