Тогтоол №901

ХЭРГИЙН ТАНИЛЦУУЛГА: "А" ХХК нь татварын улсын байцаагчийн актаар ногдуулсан торгууль болон алдангийг "Анхны ардчилсан сонгууль болж байнгын ажиллагаатай парламент байгуулагдсаны 25 жилийн ойг тохиолдуулан өршөөл үзүүлэх тухай хууль"-д хамруулахгүй байгаа хариуцагчийн эс үйлдэхүйг хууль бус болохыг тогтоолгож, дээрх төлбөрүүдийг өршөөлд хамруулахыг даалгах нэхэмжлэл гаргасан. Нэхэмжлэгч нөхөн татварыг төлсөн байна.

АНХАН ШАТ: Нийслэл дэх Захиргааны хэргийн анхан шатны шүүх нэхэмжлэлийг бүхэлд нь хэрэгсэхгүй болгосон. Шүүхээс Татварын ерөнхий хуулийн 74 дүгээр зүйлд заасан татварын хариуцлага (торгууль, алданги) нь захиргааны шийтгэлийн төрөлд хамаарахгүй тул өршөөлийн хуульд хамруулах боломжгүй гэж үзжээ.

ДАВЖ ЗААЛДАХ ШАТ: Нэхэмжлэгч давж заалдах гомдолдоо Татварын ерөнхий хуулиар ногдуулсан хариуцлага нь Захиргааны хариуцлагын тухай хуулийн утгаар захиргааны зөрчил, захиргааны шийтгэлд тооцогдох тул Өршөөлийн хуульд хамрагдах ёстой гэж маргасан. Давж заалдах шатны шүүх анхан шатны шүүхийн шийдвэрийг хүчингүй болгож, нэхэмжлэлийн шаардлагыг бүхэлд нь хангасан.

ҮНДЭСЛЭЛ: "Анхны ардчилсан сонгууль болж байнгын ажиллагаатай парламент байгуулагдсаны 25 жилийн ойг тохиолдуулан өршөөл үзүүлэх тухай хууль"-ийн 4.3-т захиргааны зөрчил гаргасан этгээдийг өршөөн хэлтрүүлэхээр заасан. Захиргааны хариуцлагын тухай хуулийн 3 дугаар зүйлд заасан захиргааны журам зөрчсөн үйлдэл нь захиргааны зөрчил бөгөөд Татварын ерөнхий хуулийн 74 дүгээр зүйлд заасан торгууль, алданги нь захиргааны хариуцлагын нэг төрөл, захиргааны шийтгэл юм. Иймд татварын байцаагчийн актаар ногдуулсан торгууль, алдангийг өршөөлд хамруулах нь Өршөөлийн хуулийн зорилго, зохицуулалтад нийцэж байна.