Тогтоол №684

ХЭРГИЙН ТАНИЛЦУУЛГА: Увс аймгийн Монгол Ардын намын хорооноос жагсаал зохион байгуулах тухай мэдэгдлийг Улаангом сумын Засаг дарга хүлээн авахаас татгалзсан тул тус шийдвэрийг хүчингүй болгуулахаар нэхэмжлэл гаргасан. Хариуцагч татгалзсан үндэслэлээ мэдэгдлийн албан бичгийн формат хуулийн шаардлага хангахгүй, жагсаалын зорилго тодорхойгүй, сонгуулийн хууль зөрчих магадлалтай, талбайн багтаамжгүй гэж тайлбарласан.

АНХАН ШАТ: Нэхэмжлэлийг бүхэлд нь хангаж, Засаг даргын шийдвэрийг хүчингүй болгосон. Жагсаал, цуглаан хийх журмын тухай хуулийн холбогдох заалтуудыг үндэслэсэн.

ДАВЖ ЗААЛДАХ ШАТ: Хариуцагч Засаг дарга анхан шатны шүүхийн шийдвэрийг эс зөвшөөрч, өөрийн татгалзсан үндэслэлүүд нь хууль тогтоомжийн хүрээнд байсан гэж гомдол гаргасан. Давж заалдах шатны шүүх анхан шатны шүүхийн шийдвэрийг хэвээр үлдээж, хариуцагчийн давж заалдах гомдлыг хангахгүй орхисон.

ҮНДЭСЛЭЛ: Анхан шатны шүүх Засаг даргын үйлдлийг Жагсаал, цуглаан хийх журмын тухай хуульд нийцээгүй гэж үндэслэлтэй дүгнэсэн. Учир нь тус хуулийн 10.1-д заасан бүртгэхээс татгалзах үндэслэлүүд хэргийг үүсгээгүй байхад Засаг дарга хуульд заагаагүй үндэслэлээр татгалзсан нь буруу. Нэхэмжлэгч хуулиар хориглоогүй газарт жагсаал зохион байгуулахаар мэдэгдсэн байна. Албан бичгийн формат, байгууллагын нэршил, талбайн багтаамж зэрэг хариуцагчийн давж заалдах гомдлын үндэслэлүүд нь захиргааны акт гаргах хууль зүйн үндэслэл болохгүй. Иймд нэхэмжлэгчийн үзэл бодлоо илэрхийлж жагсаал, цуглаан зохион байгуулах эрх зөрчигдсөн гэж үзэж, анхан шатны шүүхийн шийдвэрийг хэвээр үлдээх нь зүйтэй.