Тогтоол №1342

ХЭРГИЙН ТАНИЛЦУУЛГА: Иргэд цуглаан хийх мэдэгдлээ бүртгүүлэхэд Сонгинохайрхан дүүргийн Засаг дарга Жагсаал, цуглаан хийх журмын тухай хуульд нийцэхгүй хэмээн татгалзсан. Нэхэмжлэгчид хариуцагчийн энэхүү эс үйлдэхүйг хууль бус болохыг тогтоож, мэдэгдлийг бүртгэхийг даалгуулахаар шүүхэд хандсан.

АНХАН ШАТ: Анхан шатны шүүх хариуцагчийн цуглаан зохион байгуулах мэдэгдлийг бүртгэхээс татгалзсан эс үйлдэхүйг хууль бус болохыг тогтоож, нэхэмжлэгчдийн цуглаан хийх мэдэгдлийг бүртгэхийг даалгасан. Шийдвэрийг Жагсаал, цуглаан хийх журмын тухай хуулийн 3.1, 4.1, 10.1-ийг үндэслэн гаргасан.

ДАВЖ ЗААЛДАХ ШАТ: Хариуцагч анхан шатны шүүх нэхэмжлэлийн шаардлагын хүрээнээс хэтэрсэн, татгалзсан нь Захиргааны ерөнхий хуулийн 37.3-т заасан эс үйлдэхүй биш, мөн цуглааны зорилго Жагсаал, цуглаан хийх журмын тухай хуулийн 3.1-т нийцэхгүй хэмээн гомдол гаргасан. Давж заалдах шатны шүүх анхан шатны шийдвэрийг хэвээр үлдээж, хариуцагчийн давж заалдах гомдлыг хангахгүй орхисон.

ҮНДЭСЛЭЛ: Шүүх иргэдийн "асуудлыг үнэн зөвөөр шийдвэрлэх хүртэл суулт хийн цуглаан зохион байгуулах" зорилго нь Жагсаал, цуглаан хийх журмын тухай хуулийн 3.1-д заасан улс төр, нийгэм, хүний эрхтэй холбогдсон асуудлаар үзэл бодлоо илэрхийлэх цуглааны тодорхойлолтод нийцнэ гэж үзсэн. Цуглаан хийхээр төлөвлөсөн газар нь хуулийн 7 дугаар зүйлд заасан хориглох газарт хамаарахгүй, мөн хуулийн 10 дугаар зүйлд заасан цуглаан хийхийг татгалзах үндэслэл байхгүй болохыг тогтоосон. Иймд хариуцагчийн мэдэгдлийг бүртгэхээс татгалзсан эс үйлдэхүй нь Захиргааны ерөнхий хуулийн 37.3-т заасан хууль бус эс үйлдэхүй гэж дүгнэж, анхан шатны шүүхийн шийдвэрийг хэвээр үлдээсэн.