Тогтоол №5326

ХЭРГИЙН ТАНИЛЦУУЛГА: Жагсаал цуглаан хийх журмын тухай хуулийг баримтлан, цуглаан хийх мэдэгдлийг хүлээн авахыг даалгах, шийдвэрийг хүчингүй болгуулах тухай нэхэмжлэл. АНХАН ШАТ: Жагсаал цуглаан хийх журмын тухай хуулийн холбогдох зүйл заалтыг баримтлан, нэхэмжлэлийн шаардлага хангаж, мэдэгдлийг хүлээн авахыг даалгах шийдвэр гаргасан. ДАВЖ ЗААЛДАХ ШАТ: Анхан шатны шүүхийн шийдвэрийг эсэргүүцсэн. Жагсаал цуглаан хийх тухай хуулийн 9 дүгээр зүйлийн 1, 2, 3 дахь хэсэгт заасан журмыг зөрчсөн, нэхэмжлэлийн шаардлагыг үндэслэлгүй хангасан, шийдвэр биелэгдэх боломжгүй гэсэн үндэслэлүүдээр гомдол гаргасан.

ҮНДЭСЛЭЛ: Жагсаал цуглаан хийх журмын тухай хуулийн 9 дүгээр зүйлийн 4, 10 дугаар зүйлийн 1 дэх хэсэгт заасныг баримтлан, нэхэмжлэлийн зарим хэсгийг хангаж, албан бичгийг хүчингүй болгож, харин мэдэгдлийг хүлээн авахыг даалгах шаардлагыг хэрэгсэхгүй болгосон. Цуглаан хийх чиглэл нь хоёр дүүргийн нутаг дэвсгэрт хамаарч байвал нийслэлийн Засаг даргад хандах нь зүйтэй. Өөр арга хэмжээ давхцаж буй нь мэдэгдлийг шууд татгалзах үндэслэл болохгүй, харин зохицуулалт хийх боломжтой. Гэвч нэхэмжлэл гаргасан хугацаа өнгөрсөн тул мэдэгдлийг хүлээн авахыг даалгах шаардлага биелэгдэх боломжгүй.