Тогтоол №4993

ХЭРГИЙН ТАНИЛЦУУЛГА: Нэхэмжлэгч нь захиргааны байгууллагын даргын үйл ажиллагааны улмаас эрхээ хязгаарлагдсан гэж үзэн, тэрхүү тушаалыг хууль бус болохыг тогтоолгож, ажилд эгүүлэн тогтоолгох, ажилгүй байсан хугацааны цалин хөлсийг гаргуулах шаардлага гаргасан. АНХАН ШАТ: Захиргааны ерөнхий хууль, Төрийн албаны тухай хууль, Хөдөлмөрийн тухай хууль, Гаалийн тухай хуулийн холбогдох зүйл заалтуудыг баримтлан нэхэмжлэлийн шаардлагыг бүхэлд нь хангаж, даргын тушаалыг хүчингүй болгож, нэхэмжлэгчийг урьд эрхэлж байсан албан тушаалд нь эгүүлэн тогтоож, цалин хөлсийг гаргуулах, нийгмийн даатгалд нөхөн бичилт хийлгэхээр шийдвэрлэсэн. ДАВЖ ЗААЛДАХ ШАТ: Хариуцагч тал сонсголын ажиллагаа хийсэн, холбогдох албан бичгийг танилцуулсан, хуулийн дагуу түдгэлзүүлсэн гэх үндэслэлээр анхан шатны шүүхийн шийдвэрийг эс зөвшөөрч гомдол гаргасан. Шүүх хариуцагчийн гомдлыг хангахгүй орхиж, анхан шатны шүүхийн шийдвэрийг хэвээр үлдээсэн.

ҮНДЭСЛЭЛ: Нэхэмжлэгч нь албаны эрхээ хэтрүүлж, эрх мэдлээ урвуулан ашигласан нь бүрэн тогтоогдоогүй байхад, хариуцагч нь бодит нөхцөл байдлыг тогтоох, нотлох баримт цуглуулах үүргээ биелүүлэлгүйгээр нэхэмжлэгчийг албан үүргээ биелүүлэхийг түдгэлзүүлсэн нь хууль бус болохыг тогтоосон. Тогтоогдсон хууль бус үйлдлийн улмаас нэхэмжлэгчийн зөрчигдсөн эрх, ашиг сонирхлыг сэргээх үүднээс нэхэмжлэлийн шаардлагыг бүхэлд нь хангасан анхан шатны шүүхийн шийдвэр зөв байна гэж үзсэн.