Тогтоол №4537

ХЭРГИЙН ТАНИЛЦУУЛГА: Нэр дэвшигч сонгуулийн зардлын дансны мэдээллийг хуульд заасан хугацаанд Төрийн аудитын газарт бүртгүүлээгүй зөрчил гаргасан тул албан байцаагчаас шийтгэл ногдуулсан. АНХАН ШАТ: Зөрчлийн тухай хуулийн 17.1 дүгээр зүйлийн 21, Сонгуулийн тухай хуулийн 50.3, 57.2.8-д заасныг баримтлан шийтгэлийг хүчингүй болгож, нэр дэвшигчийн гомдлыг хангасан. ДАВЖ ЗААЛДАХ ШАТ: Хариуцагч анхан шатны шүүхийн шийдвэрийг эс зөвшөөрч, нэр дэвшигч зардлын дансны мэдээллийг хуулийн хугацаанд бүртгүүлээгүй нь тогтоогдсон тул шийтгэл ногдуулах нь хуульд нийцсэн гэж үзэн, анхан шатны шүүхийн шийдвэрийг хүчингүй болгож, гомдлыг бүхэлд нь хэрэгсэхгүй болгосон.

ҮНДЭСЛЭЛ: Сонгуулийн зардлын дансны дугаар, банкны нэрийг санал авах өдрөөс 20 хоногийн өмнө төрийн аудитын байгууллагад мэдэгдэж, бүртгүүлэх үүрэг нь нэр дэвшигчид хамаатай бөгөөд үүргээ биелүүлээгүй тохиолдолд Зөрчлийн тухай хуулийн 17.1 дүгээр зүйлийн 21-д заасны дагуу шийтгэл ногдуулах нь хуульд нийцнэ. Аудитын байгууллагаас "зөрчилгүй" гэх дүгнэлт гаргасан нь энэхүү бүртгүүлэх үүргийн зөрчлийг үгүйсгэх үндэслэл болохгүй.