Тогтоол №1250

ХЭРГИЙН ТАНИЛЦУУЛГА: Нэхэмжлэгчийг Нийслэлийн нийгмийн халамжийн газрын Халамжийн үйлчилгээний хэлтсийн даргын албан тушаалаас орон тоо хасагдсан үндэслэлээр чөлөөлсөн. Нэхэмжлэгч уг тушаалыг хууль бус болохыг тогтоож, урьд эрхэлж байсан албан тушаалд эгүүлэн тогтоох, ажилгүй байсан хугацааны цалин хөлсийг гаргуулахыг нэхэмжилсэн. Нэхэмжлэгч хэлтсийн даргын ажил, үүрэг нь хэвээр байгаа тул орон тоо жинхэнээсээ хасагдаагүй гэж маргасан.

АНХАН ШАТ: Нэхэмжлэлийг бүхэлд нь хэрэгсэхгүй болгосон. Шүүх Төрийн албаны тухай хуулийн заалтууд болон Улсын дээд шүүхийн "орон тоо хасагдсан" тухай тайлбарыг үндэслэн нэхэмжлэгчийн албан тушаал бүтэц, орон тооны өөрчлөлтөөр хасагдсан гэж үзсэн.

ДАВЖ ЗААЛДАХ ШАТ: Нэхэмжлэгчийн итгэмжлэгдсэн төлөөлөгч анхан шатны шүүхийн шийдвэрийг эс зөвшөөрч давж заалдсан. Гомдолд Халамжийн үйлчилгээний хэлтсийн даргын гүйцэтгэх ажил, үүрэг нь байхгүй болоогүй, зөвхөн албан тушаалын нэрийг хассан тул орон тоо үгүй болсон гэж үзэх үндэслэлгүй хэмээсэн. Давж заалдах шатны шүүх анхан шатны шүүхийн шийдвэрийг хэвээр үлдээж, гомдлыг хангахгүй орхисон.

ҮНДЭСЛЭЛ: Шинэ бүтэц, орон тоогоор Нийслэлийн нийгмийн халамжийн газрын Халамжийн үйлчилгээний хэлтсийн даргын албан тушаал хасагдаж, түүний үүргийг тус газрын дэд дарга хариуцахаар болсон. Иймд нэхэмжлэгчийн ажлын байр хэвээр хадгалагдаагүй гэж үзэх үндэслэлтэй. Төрийн албаны тухай хуулийн 27.2.4-т зааснаар орон тоо хасагдсан үндэслэлээр албан тушаалаас чөлөөлөх нь хууль зүйн үндэслэлтэй. Дэд даргын орон тоо хуучин бүтцэд ч байсан тул энэ нь чиг үүрэг шилжүүлсэн хэрэг болохоос, нэхэмжлэгчийн ажил үүрэг бий хэвээр байгааг нотлох үндэслэл болохгүй.